2010 -ییلده افغانستان و پاکستان اورتهسیده «اپتا» ترانزیتی سوداگرلیک کیلیشوو تاجیکستان قوشیلیشی بیلن قول قوییلگن ایدی، حاضر مذکور کیلیشوو «پتا» نامی آستیده افغانستان، پاکستان و تاجیکستان اورتهسیده امضالنهدی.
تجارت و صناعت اتاغینینگ رسمیلرینینگ سوزلریگه کوره، اوشبو کیلیشووگه قوشیلیشنی تکلیف قیلگن تاجیکستان نینگ بو ایستهگی افغانستان و پاکستان تامانیدن قبول قیلینگن.
تجارت و صناعت وزیرلیگینینگ سوزلاووچیسی مسافر قوقندینینگ سلام وطندارگه ایتیشیچه، مذکور وزیرلیکنینگ فنی بولیم مسووللری پاکستان و تاجیکستان فنی بولیم رسمیلری بیلن یقینده دوشنبه شهریده اوتکزگن اولتیریشده بو توغریده سونگی کیلیشووگه ایریشگنلر. اوشبو کیلیشوونینگ متنی یقین کیلهجکده اوچله مملکت تشقی ایشلر وزیرلیگی اورتهسیده امضالنهدی.
تجارت و صناعت اتاغینینگ سوزلاووچیسی «پتا» کیلیشوونی امضالشده افغانستان حکومتینینگ اساسی و بنیادی نیتی منطقهده افغانستان ترانزیتی مملکتگه ایلهنیشی همده ترانزیت و سوداگرلیک ساحهسیده قوشنی مملکتلر بیلن بولگن قیینچیلیکلرنی حل قیلیش دیگن.
«اپتا» کیلیشووگه ایریشیلگنیگه قرهمی، دایم افغانستانلیک سوداگرلر مذکور کیلیشوونینگ موادی پاکستان تامانیدن عملی ایتیلمهگن لیگیدن شکایتدهلر.
افغانستان تجارت و صناعت اتاغینینگ معاونی خانجان الکوزینینگ سلام وطندارگه ایتیشیچه، پاکستان سابق کبی مذکور کیلیشووگه عمل قیلمسه و بو مساله ینگی کیلیشووده نظرده توتیلمهگن حالده، اوشبو کیلیشووگه ایریشیلیشی افغانستان منفعتیگه ایمس.
شونینگدیک جناب الکوزی، مذکور کیلیشوونینگ تقدیری «ایپا» کبی بولگن حالده، صناعت وتجارت اتاغی مذکور کیلیشووگه قول قوییلیشگه قرشی دیگن.
کیلیشووده دنیا معیارلری اساسیدهگی ترانریتلر نظرده توتیلیشی حقیده تاکیدلهگن جناب الکوزی، افغانستان اقتصادی بیر دهلیزگه اوزگریشی اوچون اوشبو کیلیشوو گه هند و ترکمنستان قوشیلیشی یخشی ایدی دیگن.
مملکت تجارت و صناعت اتاغینینگ مسوللری، اوتگن بیش ییلده اپتا کیلیشووی افغانستان اقتصادی تقدیری اوچون ایجابی نتیجه آلیب کیلمهگن لیگینی ایتگنلر. اما، تجارت وصناعت وزیرلیگینینگ سوزلاووچیسی «پتا» کیلیشووی اساسیده پاکستان یُوک تَشیووچی موترلریگه افغانستان توپراغیده ایریم قُلیلیکلر شوکبی افغانستان و تاجیکستان یُوک تَشیووچی موترلریگه پاکستان توپراغیده مناسب زمینه یرهتیلیشینی تیلگه آلگن.
وزیرلیکنینگ سوزلاووچیسی پتا اوچ تامانلمه کیلیشووی امضالهنیشی بیلن حاضرگی کونده پاکستان و افغانستان ترانزیت ساحهسیده بولگن قیینچیلیگی حل ایتیلیشی کوتیلهدی.
عین حالده، تاجکستان تجارت و اقتصاد ترقیات وزیرلیگینینگ اورین باسری سید رحمان نظروف، اوشبو کیلیشوو امضالنگن حالده؛ افغانستان، پاکستان و تاجیکستان اورتهسیده تجارت و ترانزیت کیلیشووی 5 میلیارد دالر کوپهیشیگه امید بیلدیرگن.
