بوگون کابلده بیر خبر انجمنده سوزلهگن برشنا شرکتینینگ رییسی عبدالرزاق صمدینینگ ایتیشیچه، مذکور شرکتنینگ ملازملری سهشنبه کیچه 90 میگاوات کوچگه ایگه بیر لین برقنی کابلگه ییتکزیشگه موفق بولگنلر.
جناب صمدینینگ سوزلریگه کوره، سونگی هفتهلرده روی بیرگن قار کوچگیسی نتیجهسیده سالنگلرده قطار پایهلر ییقیلیب اورتهدن کیتگن؛ شونینگدیک اوچ پایه ایسه جدی شکست کورگن. برشنا شرکتینینگ رییسیگه کوره، هوا وضعیتی شونده قالگن حالده، کیلگوسی اوچ هفتهگه قدر کابلنینگ برق معماسی حل ایتیلهدی.
عین حالده، صمدی، برشنا شرکتینینگ ملازملری کیلهجکلرده پایهلرگه زیان ییتمسلیگی اوچون لازم چاره تدبیر آله یاتگنلیگینی بیلدیرگن. سالنگلرده یوز بیرگن آغیر قار و بوران مملکتنینگ نیچه ولایتی جملهدن پایتخت کابلنینگ برق جریانی کیسیلیب قالیشیگه باعث بولدی.
شونینگدیک برشنا شرکتینینگ باشلیغی، طبیعی حادثهلرده برق جریانیگه زیان ییتمسلیگی اوچون اساسی ایشلر قیلینیشی حقیده سوز یوریتگن.
طبیعی واقعهلرده برق پایهلری اوچون مدافعهوی دیوارلر تاسیس ایتیلیشی برشنا شرکتی نینگ کیلهجکلرده برق پایهلریگه نقصان ییتمسلیگی اوچون آلهجک تدبیرلریدن سنهلهدی.
کابل برقینی کیسیلیب قالگنلیگی ایریم شکایتلرگه هم سبب بولگن ایدی. اوشبو برق جریانی کیسیلیب قالگنی اوچون اهالینینگ ییش اویی قارانغوگه چومیلگنلیگیدن تشقری کارخانهلر و محصولات ایشلب چیقرووچی شرکتلر هم توختهلیب قالگن ایدی.
