د پاکستان د لومړي وزیر ځانګړی استازی مشاهد حسین سید او د پاکستان د اسمبلۍ یو غړی د دې له پاره امریکا ته تللی، چې د کشمیر د ستونزې په اړه له امریکایي چارواکیو مرسته وغواړي.
د رپوټونو له مخې، مشاهد حسین سید په واشنګټن کې د امریکا اتلانتيک کونسل په نوم څیړنیزیو مرکز کې ویلې، چې د امریکا ولسمشر بارک اوباما باید په دې پوه شي، چې د اسلام اباد له همکارۍ پرته په افغانستان کې سوله نه شي راتللی.
ده دا هم ویلي، چې د کشمیر د مسلې له هوارولو پرته افغانستان کې سوله نه امکان نه لري.
د چارو شنونکي په دې باوري دي، چې پاکستاني چارواکي په دا ډول څرګندونو سره یو ځل بیا دا په ډاګه کوي، چې دوی د افغانستان په کورنیو چارو کې لاسوهنه کوي او ټولې نړۍ ته ترهګر صادروي.
د سیاسي چارو شنونکی طوفان وزیري له سلام وطندار سره په خبرو کې وویل، چې د پاکستاني چارواکیو دا ډول دریځ د دې ښکارندوی کوي، چې دغه هېواد په نړیوال سیاست کې ګوښی شوی او ترڅنګ یې دا هم په ډاګه کوي، چې پاکستان د افغانستان او سیمې په بې ثباتۍ کې لاس لري.
د ښاغلي وزیري پر وینا، پاکستاني چارواکي غواړي په داسې څرګندونو سره وښیي، چې ترهګرې ډلې د دوی په لاس کې دي او د هر ډول کارونې ولکه یې د دوی په لاس کې ده.
دا لومړی ځل نه دی، چې پاکستاني چارواکي په خپل هېواد کې د ترهګریزو ډول د ملاتړ او پټنځای په اړه دا ډول څرګندونې کوي، بلکې له دې مخکې د پاکستان د ملي امنیت سلاکار سرتاج عزیز هم ورته څرګندونې کړې وې.
د چارو بل شنونکی محمد یونس فکور وایې، دا ښکاره ثبوت دی، چې پاکستان د خپلو ګټو له پاره په افغانستان کې د جګړې او طالبانو ملاتړ کوي.
فکور زیاتوي، چې د بروکسل په غونډه کې نړیوالې ټولنې د افغانستان سیاسي او مالي ملاتړ څرګند کړ او د افغانستان پر ګاونډیو هېوادونو یې غږ وکړ، چې له افغانستان سره د سولې په ټینګښت کې مرسته وکړي.
د ده په باور، پاکستان داسې فکر کوي، که نړیوال یې اړ کړي، چې هرومرو باید د افغان سولې په اړه ګامونه پورته کړي؛ نو دوی به ورته وواي، چې اول دې د کشمیر لانجه حل شي؛ بیا به دوی د افغان سولې په اړه مرسته وکړي.
مشاهد حسین سید پخوا د پاکستان د اطلاعاتو او کلتور وزیر و او اوس د پاکستان د لومړي وزیر ځانګړی استازی دی. ویل کېږي، چې له دې مخکې هم ده په ځېنو مجلسونو کې داسې څرګندونې کړې وې، چې د کشمیر مسلې له هواري پرته د افغان دولت او طالبانو ترمنځ د سولې خبرې نه شي بریالۍ کېدلی.
ده د خپل وروستي سفر پر مهال امریکا ته ګواښ کړی، که د کشمیر د لانجې په اړه له پاکستان سره مرسته ونه کړي؛ دوی به روسیې او چین ته مخ کړي.
خو شنونکي په دې باوري دي، چې په پاکستان کې د امریکا تشه د روسیې او چین په ګډون بل هېڅ هیواد نه شي ډکولی او پاکستانیان یوازې غواړي، چې په دې سره له امریکایانو امتیاز واخلي.
