افغانستان بوییچه ناتو کوچلرینینگ عمومی قومندانی جنرال جان نیکلسون، کابل، پروان و کاپیسا ولایتلرینینگ رسمیلری بیلن اوتکزگن قوشمه ییغینیده ایتیشیچه، آمریکا و افغانستاننینگ دوشمنی بیر دیر و افغانستانده تینچلیک تأمینلنیشی و اوروش گه نقطه قوییلیشی اوچون آمریکا هیچ قندهی سعی و حرکتدن وازکیچمهیدی. جناب نیکلسوننینگ ایتیشیچه، افغانستان امنیتی کوچلری اینیقسه هوایی کوچلر جهازلنیشی خصوصیده، آمریکا سعی و حرکت قیلهدی.
ناتو کوچلری عمومی قومندانینینگ ایتیشیچه، اولر کیلهجک ایکی ییلده افغانستاننینگ پارلمان و جمهورلیک ریاستی سیلاولری تنیق شکلده یولگه قوییلیشینی کوتهدیلر و شونینگدیک، سیاسی حزبلر تینچلیک تأمینلنیشی خصوصیده، حکومت گه یاردم بیریشی کیرهک.
نیکلسوننینگ اورغولشیچه، آمریکانینگ ینگی استراتیژیسی اساسیده، طالبلر و اولرنینگ طرفدارلری اینیقسه پاکستاننینگ اوستیگه حربی و دیپلوماتیک باسقینلر کوپهیتیریلهدی و بو گروهنی مذاکره اوچون حاضر قیلیشگه زورلهیدی.
بیراق، اوشبو ییغینده نمایندهلر کینگشی اعضالرینینگ ایتیشیچه، آمریکا ینگی استراتیژیسینی کمیده 10 ییل آلدین عمل گه آشیرسه ایدی.
نمایندهلر کینگشیده پروان اهالیسینینگ نمایندهسی و ملی انسجام ایشلری بوییچه جمهور رییس غنینینگ مصلحتچیسی محمدالماس زاهدنینگ ایتیشیچه، افغانستان اهالیسی دنیا امنیتی اوچون اوروش میدانیده توختهگن و حاضر دنیا جماعهچیلیگیدن تینچلیک ایستهیدی. نمایندهلر کینگشینینگ اوشبو اعضاسی، آمریکادن افغانستان اوروشیده کونده 26 میلیون دالر خرچ قیلیش یانیده، اقتصاد و رواجلنتیریش پروژهلرگه هم دقت قیلیشینی سورهدی.
بو بیرینچی مرته کیم ناتو کوچلرینینگ عمومی قومندانی شمالی ولایتلرنینگ محلی رسمیلری بیلن بحث اوتکزگن.
