پاکستان دولتی افغانستان اساسی قانونی و نظامی‌گه قرشی بولگن طالب‌لر و باشقه عصیانچی گروه‌لر مذکور تیزیم‌گه باش ایگمه‌گن صورتده، نابود قیلیش وعده‌سینی بیردی.
آتی توتیلیشی‌نی ایستمه‌گن حکومت منبع‌لریدن بیری‌نینگ سلام‌وطندارگه ایتیشیچه، پاکستان، چین و امیریکه نماینده‌لری حضوریده بوگروه‌لر نابود ایتیشی‌گه وعده بیرگن. بومنبع‌گه کوره، چین و امیریکه نماینده‌لری پاکستان نینگ وعده‌سیگه عمل قیلیشی‌نی ضمانت قیلگن‌لر.
ایتیلیشیچه، پاکستان رسمی‌لری بوگون (چهارشنبه) آسیا یوره‌گی ییغینی چیکه‌سیده افغانستان، پاکستان، امیریکه 3 تامانلمه و افغانستان، پاکستان، چین و امیریکه 4 تامانلمه اولتیریشی‌ده بو وعده‌نی بیرگن و افغانستان قانونی و تیزیمی‌گه قرشی بولگن گروه‌لر نابود ایتیش باره‌سیده کیره‌کلی ایشلرنی عمل‌گه آشیریش‌لری کوزه‌تیلگن.
منبع‌گه کوره، جمهور رییس محمداشرف غنی مذکور اوچره‌شووده پاکستان‌دن افغانستان‌گه یوباریله‌دیگن عصیانچی گروه‌لرنی قبول قیلمی‌میز دیگن.
بو اولتیریش‌لرده ملی امنیت مصلحت‌چیسی حنیف اتمر و تشقی ایشلر وزیری صلاح‌الدین ربانی‌لر اشتراک ایتیش‌لری بیلن امیریکه و چین نماینده‌لری حضوریده اوز ایسته‌کلرینی پاکستان بیلن شریک قیلگن‌لر.
بو اوچره‌شووده جمهور رییس غنی پاکستان‌دن تینچ‌لیک توغریسی‌ده بوله‌دیگن سوزله‌شوولر زمینه یره‌تیشی‌گه تأکید قیلیب، افغانستان تامانیدن ارایه بولگن شرایط‌نی عملی قیلیشی لازم دیب ایتیلگن.
ملی بیرلیک حکومت ایجاد ایتیلیشی بیلن افغانستان و پاکستان رابطه‌لری سابقه سیز شکلی‌ده یخشی‌لنیب بارماقده ایدی و پاکستان ایسه طالب‌لر بیلن بیرینچی دور سوزله‌شیشلر میزبان‌لیگی‌نی زمه‌سیگه آلدی؛ بیراق ملاعمر اولیشی فاش ایتیلیشی بیلن کابل‌ده قانلی هجوم‌لر اویوشتیریله باشله‌ندی، حادثه‌لر باعث ایکی اولکه رابطه‌لری قیته یمان‌لشیب قالدی.
