مین، مملکت خبرچیلریدن باشقه 10 تهسی بیلن 8 کونلیک سفرده پاکستان باردیم. بو سفرده پاکستان مجلسی، خبرچیلر بیرلیگی، بیلیم یورتلر، کسلخانهلر، میدیالر، تاریخی ییرلر، یاش داکترلر اویوشمهسی و فیلم باشگاهسیدن کوریب چیقدیک.
سفریمیز جریانیده، پاکستاننی کته و معتبر قوریلمهلری، مرکزلرینی کوریب، پشاور شهریده جایلشگن عبدالولیخان بیلیم یورتیگه باردیک. اوشبو بیلیم یورت هر بیر فاکولتهسیده افغان اوقووچیلری کورینهدی. مذکور بیلیم یورتده پاکستانلیک اوقووچیلر بیلن اوتکزگن صحبتیمده بو نتیجهگه ایریشدیم کیم، اوشبو اوقووچیلر، طالبان و برچه تروریستی گروهلرنینگ اصلی اورنی افغانستانده دیب بیلهدی، اولر اوشه ییردن پاکستاننی تهدید قیلهدی دییدی. بیراق مذکور بیلیم یورت ژورنالیزم فاکولتهسینینگ باشلیغی شیراز پراچا باشقچه توشینهدی. اونگه کوره، پاکستان، افغانستان برابریده قیلگن حرکتلری باعث، اوشبو مملکتدن عذر سورهشی کیرهک.
شونینگدیک خیبر پشتونخواه اپوزیسیون باشلیغی و سابق معارف وزیری سردار حسین بیلن اوچرهشیب منطقه بویلب طالبلر تهدیدی خصوصیده بحث اوتکزدیک. جناب حسینگه کوره، پاکستان تروریستی گروهلرگه قرشی عملیات اوتکزگنیدن کیین، اوشبو گروه برچه اعضاسی افغانستانگه باریب و او ییردن پاکستان ثباتینی تهدید قیلیش خصوصیده سعی و حرکت قیلهدی.
باشقه تاماندن، پاکستان مدنیتچیلری و مدنی فعاللرینینگ ایتیشیچه، اولر افغانستان اجتماعی ترماغلرینی ایزلهیدی؛ ایشانچ لریگه کوره، افغانستانده اجتماعی ترماغ ایشلاوچیلری، پاکستانگه قرشی حرکت قیلهدی و بو مملکتگه قرشی کینگ کولمده تبلیغ قیلهدیلر.
عین حالده، مجلس سابق عضوی خانم بشری گوهرنینگ ایشانچیگه کوره، افغانستان بیلن پاکستان سیاستی ناتوغری دیر و ایکی مملکت اورتهسیدهگی علاقه یخشیلنیشی خصوصیده سیاستلرینی اوزگرتیریشی لازم. شونینگدیک پاکستان یازووچیلری و خبرچیلریدن ایکی تهسی هارون رشید و نورالله بشیر نویدنینگ ایتیشیچه، افغانستان بیلن پاکستان بیرگهلیک دلیللر باعث، هیچ قچان بیری- بیراویدن اوزاقلشهآلمهیدی و اوشبو ایکی مملکت اوزاقلهشی هیچ بیرینینگ منفعتیگه ایمس دیر.
بیراق، پاکستان بوییچه افغانستان ایلچیخانه شارژدافیری ناصر یوسفی، ایکی قوشنی مملکت اورتهسیدهگی علاقه یمانلشگنینی باشقچه توشینهدی. اونینگ، افغانستان خبرچیلری بیلن اوچرهشگن چاغیده ایتیشیچه، افغانستان مهاجرلر وزیرلیگیدن بیر یوز کیشیلیک هیأت، سپتمبر آییده حجتسیز مهاجرلرنی رویخطگه آلیش اوچون پاکستان کیلیشگه قرار قیلگن ایکن؛ بیراق پاکستان دولتی تامانیدن اولرگه ویزه بیریلمهگنی باعث، حاضرگچه آرتده قالگن. شونینگدیک جناب یوسفینینگ، پاکستان بیلن افغانستان سلبی علاقهسی خصوصیده ایتیشیچه، ایکی مملکت علاقهسی یمانلشگنیدن کیین، افغانستان مخابرات ترماغلرینی رومینگ خذمتلری پاکستان تامانیدن یاپیلگن؛ عین حالده، پاکستانلیک ترماغلرنی رومینگ خذمتلری افغانستانده فعال دیر.
تورتینچی مرته کیم، افغانستان بیلن پاکستان خبرچیلری بیری- بیراوی بیلن اوچرهشهدی. اوشبو اوچرهشوولر تیزیمی میلادی 2014- ییلدن بویان «اکول اکسس» مؤسسهسی تامانیدن یولگه قوییلگن و بو اوچرهشوولردن مقصد، ایکی مملکت خلقینینگ اورتهسیده بولگن سلبی فکرلرنی اورتهدن کوتریش دیر.
ایتیش لازم، افغانستانده پاکستانلیک میدیالر نشراتی بوتونلهی آزاد دیر، بیراق افغانستان میدیالرینینگ نشراتی پاکستانده میلادی 2005- ییلدن کیین توختهتیلگن و یالغیز مذکور مملکت دولتیگه 15 میلیون دالر توللب، پاکستان ایچیده نشرات بیرهآلهدی.
افغانستان بیلن پاکستان علاقهسی، کابلده یوزبیرگن قانلی حادثهلر و پاکستان دولتی تروریستلردن حمایت ایتیشگه عیب لنگنیدن کیین، جدی شکلده یمانلشدی. دیمک ایکی مملکت هردایم بیری- بیراویگه قرشی حرکت قیلهدی و یمان شرایط هم منطقهده حاکم بولگن. عین حالده، ایکی مملکت میدیالری ایکی ملتنی بیری- بیراویگه یقینلشتیریش خصوصیده قیلگن حرکت قنقهلیگی بیللی ایمس دیر.
