افغانستان تینچلیک مسالهسی توغریسیده بو مملکت نینگ نمایندهسی تکلیف قیلینمسدن روسیه، چین و پاکستان دولتلری نمایندهسی اشتراکیده اوتکزیلگن اوچ تامانلمه ییغین تنقید آستیگه آلینیشی آقیمیده بوگون مملکت ملی مجلس نینگ اعضالری مساله توغریسیده عکس العمل بیلدیردی.
رسمی مسکو، پیکینگ و اسلام آباد نمایندهلری بوندن بیش کون اول مسکوده اوچرهشیب افغانستان مسالهسینی محاکمهگه آلیشگن ایدی. بو اولتیریشده افغانستان دولت قوراللی مخالفلری بولمیش طالبان نینگ بعضی قوماندانلری نامی بیرلشگن ملتلر تشکیلاتی نینگ قاره رویخطیدن چیقاریلیشی بحثگه آلینگن.
نمایندهلر مجلسی نینگ اعضالری بو قبیل اولتیریشلر ایجابی نتیجه بیریشی ممکن ایمس دیدیلر. رسمی مسکو و پیکینگ نینگ رسمی کابل بیلن سیاسی علاقهسی جوده یخشی، بوندهی ییغینگه افغانستان حکومتی نینگ نمایندهسی چقیریلمسلیگی اوچون هیچ بیر دلیل یوق دیگن مجلس اعضالری.
.jpg)
افغانستان پارلمانی نینگ باشلیغی عبدالرووف ابراهیمی، بخت طالبان نینگ فایدهسیده هلی پاکستاندن تشقری روسیه و چین هم بو حرکت منفعتینی کوزلب فعالیت آلیب بارهدی دیگن. افغانستان حکومتی بیلن اورتاقلیک ادعا قیله دیگن قوشنی دولتلر تامانیدن بوندهی ییغین اوتکزیلیشی ایریم سوراقلرنی پیدا قیلهدی دیگن جناب ابراهیمی.
مجلس نینگ ینه بیر اعضاسی عبیدالله بارکزی، افغانستان دولتی نینگ رسمی مسکو، واشنگتن و ناتو بیلن امضا چیککن اوزاق مدتلی شرطنامهسی هیچ قندهی ایجابی نتیجه بیرمهگن لیگیگه اشاره قیلگن. دنیا دولتلری شخصی منفعتلریگه ایریشیش اوچون افغانستاننی اوروش میدانیگه ایلنتیرماقچی بولهدیلر دیگن پارلمان اعضاسی.
مسکوده اوتکزیلگن ییغینده افغانستان نمایندهسی چقیریلمهگن لیگی آرتیدن حکومت کنفرانسده اشتراک قیلگن دولتلردن بو خصوصده آچیقلیک بیریش طلبی بیلن چیققن ایدی. بو حقده افغانستان حکومتی نینگ شکایتی آشگنیدن سونگ روسیه نینگ افغانستان مسالهسی اوچون مخصوص نمایندهسی ضمیر کابلوف ییغینده افغانستانگه عاید موضوع اوستیده بحث بولیب منطقهوی همکارلیکلرگه تاکیدلندی دیگن.
