پارلمان نماینده‌لریدن بیرقطاری، جمهور رییس و اجراییه باشلیغی‌دن، قندوزده امنیتی کوچلر عملیات‌لری اوزگرتیریلیشینی سوره‌دی. شونینگ‌دیک اولر شنبه کونگی ییغینده، اوشبو عملیات‌لر مذکور ولایت‌نینگ برچه تومن‌لرده یولگه قوییلیشینی تیلگه آلدی.
نماینده‌لر کینگشی باشلیغی عبدالرؤوف ابراهیمی‌نینگ ایتیشیچه، قندوز ولایتی چهاردره و دشت ارچی تومن‌لری طالب‌لردن تازه‌لنمه‌گن صورتده، مذکور ولایت‌ده امنیتی کوچلر عملیاتی ناکام بولیشی ممکن. جناب ابراهیمی‌گه کوره، طالبلر اوشبو منطقه‌لرده قرارگاه، کسلخانه و قوت‌لریگه قیته‌تیکلش مرکزلر قورگن.
شونینگ‌دیک پارلمان نماینده‌لریدن بیری نظیفه ذکی، مذکور ولایت‌ده امنیتی کوچلر عملیاتی‌نی ییترلی بیلمه‌یدی. اونینگ ایتیشیچه، طالبلر چهاردره و دشت ارچی تومن‌لریده حربی جهازگه ذخیره توزه‌تگن و بو گروه ایریم پیت‌لرده اوشبو منطقه‌لرگه باریب، مملکت حربی کوچلری‌گه قرشی کوره‌شیش خصوصیده تیارگرلیک آله‌دی.
اوشبو نماینده‌لرنینگ اورغولشیچه، طالبلر بوتونله‌ی قندوز ولایتی‌دن تازه‌لنمه‌گن صورتده، هیچ قچان مذکور ولایت خوفسیزلیگی تأمین‌لنمه‌یدی.
شونده‌ی حالده، جمهور رییس اوتکن شنبه کون مذکور ولایت بدرغه‌لری بیلن اوچره‌شیب قندوز ولایتی‌نینگ برچه تومن‌لری و قوشنی ولایت‌لری‌گه کینگ شکلده حربی عملیات اوتکزیلیشی‌دن خبر بیردی.
شونینگ‌دیک مجلس نماینده‌لری‌نینگ ایتیشیچه، اوشبو اداره تامانیدن قندوزده یوزبیرگن واقعه هر تامانلمه تیکشیریلیشی خصوصیده بیر هیأت یوباریله‌دی. مجلس باشلیغی، ایچکی امنیت و دفاعی کمیسیونی‌دن تیزلیک‌ده مذکور هیأت‌گه شامل بوله‌دیگن نماینده‌لر رویخطی‌نی تیارلب، اداری هیأت‌گه تاپشیریشینی سوره‌دی.
قندوز بدرغه‌لری: حکومت بیزلرگه قره‌مه‌یدی
قندوز بدرغه‌لری شنبه کون کابل‌ده ایری شکلده ایکی ناراضیلیک نمایش اوتکزیب دولت‌دن وضعیت لریگه دقت قیلیشینی سوره‌گن. اولرنینگ ایتیشیچه، کیچه‌لر یوللرده حیات کیچیره‌دی و حاضرگچه اولرگه هیچ قنقه یاردم بیریلمه‌گن.
شونینگ‌دیک اوشبو بدرغه‌لر، حکومت‌دن قندوز سقوطی‌گه سبب بولگن کیشی‌لر محکمه بولیشینی سوره‌دی.
عین حالده، قندوز خلقی‌نینگ پارلمانده‌گی نماینده‌سی شکریه پیکان، مذکور ولایت بدرغه‌لری خصوصیده، دولت‌نی دقت سیزلیک‌که عیب‌لب کوپه‌یتیریشیچه، دولت حاضرگچه قندوز اوروشی قمراوی‌گه قالگن یشاوچیلر وضعیتی‌گه دقت قیلمه‌گن.
مملکت حادثه‌لری‌گه قرشی کوره‌شیش کمیسیونی‌نینگ رقمی‌گه کوره، قندوز ولایتی‌گه یوزبیرگن سونگی اوروش‌ده 12 مینگ‌دن آرتیق عایله بدرغه بولگن، ایتیلیشیچه، اوشبو بدرغه‌لردن 80 فایزی یمان وضعیت‌گه حیات کیچیره‌دی. اوشبو بدرغه‌لر بغلان، تخار، بدخشان، سمنگان، کابل، پروان، کاپیسا و پنجشیر ولایت‌لری‌گه باش پناه ایزلب بارگن.
