د امریکا ولسمشر ویلي، د بهرنیو چارو وزیر مایک پومپیو هم دوحې ته ځي ترڅو د سولې د بین الافغاني خبرو په پرانيستونکيو مراسمو کې ګډون وکړي.
د امريکا د بهرنیو چارو وزارت د بینالافغاني مذاکراتو له پیلېدو هرکلی کړی او سولې ته د رسېدو یوازینۍ لار یې خبرې اترې بللې دي.
دغه راز، د قطر د بهرنیو چارو وزارت تېره شپه په یوه خبرپاڼه کې اعلان وکړ چې دا هېواد به د سپټمبر په دوولسمه د شنبې په ورځ د افغانانو ترمنځ د خبرو کوربه وي.
دا په داسې حال کې ده چې افغان حکومت او طالبانو منلې چې د سولې بینالافغاني خبرې به د شنبې په ورځ پیل شي. حکومت وايي، مرکهچي پلاوی یې نن جمعه دوه بجې له حامد کرزي نړیوال هوايي ډګر نه د قطر پلازمېنې دوحې ته روانېږي.
طالبانو هم تایید کړې چې ۶ بندیان یې قطر ته رسېدلي او د شنبې په ورځ به بینالافغاني خبرې پیل شي.
د ولسمشر ویاند صدیق صدیقي پر خپله ټوېټر پاڼه لیکلي، د سولې خبرو پرانيستغونډه کې به د مصالحې عالي شورا رييس عبدالله عبدالله، د بهرنیو چارو سرپرست وزیر محمد حنیف اتمر، د سولې په چارو کې د افغان ولسمشر ځانګړی استازی سلام رحیمي او د سولې چارو لپاره د دولت وزیر سید سادات منصور نادري د افغانستان اسلامي جمهوریت استازیتوب کوي.
په قطر کې د طالبانو د سیاسي دفتر ویاند محمد نعیم وردک هم منلې چې د خبرو لپاره چمتوالی بشبړ شوی او طالبان هوډ لري چې مذاکرات ښه پر مخ لاړ شي.
