ټاکنې؛ د سوله‌ییز ژوند یوازینۍ لار

د ولسمشر دویم مرستیال سرور دانش وايي، افغانان د سوله‌ییز ژوند له‌پاره تر ټاکنو پرته بله هېڅ لار نه‌لري.

د نوموړي په وینا، د خلکو پرمخ د ټاکنو دروازې تړل، د ملي ګټو او افغانانو د حقونو خلاف او د سوله‌يیز ژوند مخنیوي له‌پاره هڅه ده چې باید ترې ډډه وشي.

دانش زیاتوي، اوس‌مهال د ټاکنو ځنډ او د لنډمهالې ادارې یا لویې جرګې جوړول د هېواد روښانه راتلونکې له‌پاره معقولې لارې نه‌دي.

خو د افغانستان نوې ملي جبهې رییس انوارالحق احدي بیا د ټاکنو پروسې کې د بشپړې روڼتیا نه‌موجودیت په اړه اندېښنه ښيي او وايي، د بایومټریک له مخې د راتلونکیو ټاکنو کول، د روڼتیا یوازینۍ لار ده چې تراوسه ورته پام شوی نه‌دی.

بلخوا د افغانستان له‌پاره د ملګرو ملتونو د سرمنشي ځانګړي استازي تادامېچي یاماموتو د ولسي جرګې او ولسوالیو شوراګانو راتلونکیو ټاکنو کې د احتمالي ځنډ په اړه اندېښنه ښودلې ده.

نوموړي ویلي، افغانستان کې روان سیاسي او امنیتي وضعیت کېدای شي د راتلونکیو ټاکنو پر نېټې ناسم اغېز وکړي او دا پروسه له خپل اصلي مسیره راوګرځوي.