د ولسي جرګې په نننۍ غونډې کې د نورو موضوعګانو ترڅنګ وکیلانو یو ځل بیا د افغانستان او امریکا ترمنځ امنیتي تړون په اړه د یو بل خلاف نظرونه څرګند کړل.
ځېنو وکیلانو وویل چې دغه تړون د افغانانو په ګټه دی او په وینا یې داسې وکیلان شته چې د سیاسي کتنو پر بنسټ له دغه تړونه ناوړه ګټه پورته کوي او د باج اخېستلو په موخه یې پر تړون د بیا کتنې موضوع راپورته کړېده.
د کندوز استازي کمال ساپي وویل چې ټول وکیلان باید مسوولانه نظر ولري او د سیاسي باج لهپاره د امریکا په اړه غیرمسوولانه خبرې د ولسي جرګې له وکیلانو سره ښې نه ښيي.
ده زیاته کړه، امریکا او ولس یې په نړۍواله کچه د افغانستان ستر ملاتړی دی او په بېلابېلو برخو کې له افغانستان سره مرستی کوي. د ده په وینا دا تړون د افغانستان په ګټه دی.
.jpg)
خو د ولسي جرګې لومړي نایب همایون همایون ـ چې د جرګې مشري یې کوله ـ وویل، تېره اوونۍ شوې پرېکړه، د امنیتي تړون د لغوې په اړه نه، بلکې پر دې تړون د بیا کتنې په موخه شوېوه.
ښاغلي همایون زیاته کړه، اکثرو وکیلانو تېره اوونۍ د تړون مخالفت کولو؛ خو نن یې پلوي کويږ
د جرګې غړې شکېبا هاشمي وویل، امریکا د امنیتي تړون د لاسلیکولو پرمهال له افغانستان سره مهمې ژمنې کړېوې چې تر اوسه یې یوه هم نهده عملي کړې.
په همدې حال کې د ولسي جرګې غړۍ ګلالی نور ساپۍ وویل چې د ولسي جرګې په تېره غونډه کې د افغانستان او امریکا ترمنځ پر امنیتي تړون د بیا کتنې په اړه پرېکړه ځکه ناقانونه وه چې د جرګې نصاب پوره نهو.
په غونډې کې ځېنو وکیلانو او د جرګې لومړي نایب د ولسمشر پر دویم مرستیال هم نیوکې وکړې چې تېره ورځ یې د افغانستان او امریکا ترمنځ پر امنیتي تړون د بیا کتنې په اړه د ولسي جرګې پرېکړه د ملي ګټو خلاف بللې وه.
