عبدالله خان حبیبي او معصوم ستانکزي په ترتیب سره له ولسي جرګې نه د باور ۱۶۷ او ۱۶۱ رايي واخیستې او د دفاع وزارت او ملي امنیت عمومي ریاست څوکۍ یې خپلې کړې.
د جرګې په نننۍ غونډه کې ۲۲۴ وکیلان حاضر وو او د هر نوماند د بریالي کېدا له پاره ۱۱۳ رایې تعین شوې.
وکیلانو معصوم ستانکزي ته ۴۱ رد، ۱۵ باطلې او ۸ سپینې رایې ورکړې او عبدالله خان حبیبي ته یې ۳۴ رد، ۱۳ باطلې او ۶ سپینې رایې ورکړې.
محمد زمان سنګري هم په نننۍ غونډه کې په ۱۳۲ تاييد او ۵۲ رد رایو د سترې محکمې غړیتوب ترلاسه کړ.
ستانکزي د رايي اچونې له بهیره مخکې د ملي امنیت په ریاست کې د سمونونو په راوستلو سره وویل، چې دې ریاست ته له ننوتلو سره به د امنیتي وضعیت په ښه والي کې له هېڅ نه درېغ ونه کړي. هغه زیاته کړه، چې په مرور د وخت سره جرمونه پرمختګ کوي او دی به د جرمونو په راکومولو او امنیتي حالت په ښه والي کې له نوې ټکنالوژۍ نه کار واخلي.
عبدالله خان حبیبي هم د جنګ په برخه کې د سمونونو په اړه معلومات ورکړل، هغه وویل، چې د طالبان پر وړاندې به د امنیتي ځواکونو شپنیو عملیاتو کې زیاتوالی راولي. د حبیبي پر وینا، د امنیتي ځواکونو په روزنه او تشکیلاتو په شمېر کې بدلون راوستل یې لومړیتوب دی.
معصوم ستانکزی له دې وړاندې په بېلابېلو پستونو دنده اجرا کړې او د حکومت د پرېکړو له مخې کله په یو پست او کله په بل هغه ټاکل کېږي. دی یو ځل تېر کال د سرطان په میاشت کې ولسي جرګې ته د دفاع وزیر په توګه د رايو اخیستنې له پاره ورپېژندل شوی و، خو له جرګې بریالی راونه وت.
