د ولسي جرګې غړيو د دې جرګې د ریاست پر څوکۍ تر لس ورځني کړکېچ وروسته، بالاخره نن د یاد کړکېچ تر حل پرته د کوچني اختر تر پایه رخصتي وکړه.
د ولسي جرګې یوشمېر غړي وايي، ځینې وکیلان عمرې یا هم خپلو ولایتونو ته ځي او همدا لامل و چې د رایو په ډېروالي سره یې د کوچني اختر تر پایه د رخصتۍ موضوع تایید کړه.
د ولسي جرګې غړي عبدالخالق او میرحیدر افضلي وايي، نن یې د رایو په ډېروالي سره پرېکړه وکړه چې د کوچني اختر تر پایه رخصتي وکړي.
خو د ولسي جرګې یوشمېر نور غړي وايي چې وکیلانو د ځینو سیاسي معاملو لپاره رخصتي کړې ده.
د دوی په وینا، که څه هم ځینو وکیلانو غوښتل چې د ولسي جرګې کار دوام وکړي، خو شمېر یې کم و او همدا لامل شو چې ولسي جرګه رخصت شي.
په همدې حال کې یو حقوقپوه وحید فرزهيي وايي، که څه هم د قانون له مخې د ولسي جرګې رخصتي ستونزه نهلري، خو له ټولنیز اړخه به د وکیلانو دا کار پر دوی د خلکو شته باور ته زیان ورسوي.
د نوموړي په وینا، د افغانستان اوسني وضعیت ته په کتو، دا ډول رخصتۍ بېّځایه او د توجیه وړ نهدي.
فرزهيي زیاتوي، د ولسي جرګې غړیو باید پهدې موده کې خپل اداري پلاوی بشپړ کړی وای چې په هېواد کې د قانونجوړونې بهیر هم ورسره ګړندی شوی وای.
