بوگون «پنجشنبه» کابل‌ده افغانستان بوییچه اسلامی جمعیت حزبی اجراییه باشلیغی عطامحمد نورنینگ سیاسی دفتری تامانیدن «1398- ییل، 1- جوزا دن کیین، ناقانونی حکومت سیاسی مشروعیت بوشلیگی» نامی‌ده یولگه قوییلگن ییغینده سیلاو تیرمه جماعه‌لریدن بیرقطاری، سیاسی حزب‌لر، قوم بویوک‌لری و کابل یشاوچیلری، ینه بیربار سرپرست و یا-ده وقتینچه‌لیک حکومت ایجاد ایتیلیشی‌نی سوره‌گن‌لر.
جمهورلیک ریاستی نامزدلریدن بیری احمدولی مسعودنینگ ایتیشیچه، ملی بیرلیک حکومتی نامشروع دیر. اونینگ کوپه‌یتیریشیچه، «بو ملی بیرلیک حکومتی ایمس چونکه رهبرلری باشلنگدن حاضرگه‌قدر اوز آره‌لریده کیلیشمه‌گن‌لر و آره‌لریده بولگن جنجل‌لر حاضرگه‌قدر حل بولمه‌گن.»
جناب مسعود، عالی محکمه‌دن جمهور رییس ایشی‌نینگ دوامی‌نی تمدید قیلگنی توغریسیده حقوقی ایش بیلرمانلریگه وضاحت بیریشی‌نی سوره‌گن. اونینگ ایتیشیچه، اساسی قانونگه کوره، جمهور رییس ایشی‌نی تمدید قیلیش اوچون عالی محکمه‌نینگ حقی یوق دیر.
اوتگن کونی هم جمهورلیک ریاستی نامزدلریدن بیرقطاری و حقوقی ایش بیلرمانلر «بیرینچی جوزا حرکتی، قانونگه مراجعت قیلیش» آتیده بیر ییغین آرقه‌لی، عالی محکمه‌دن جمهور رییس ایشی‌نینگ دوامی‌نی تمدید قیلگنی توغریسیده، اهالیگه وضاحت بیریشی‌نی سوره‌گن ایدیلر.
بو توغریده عالی محکمه فکرینی آلیش اوچون سعی و حرکت قیلدیک، بیراق موفق بولمه‌دیک.
اوشبو ییغینده اشتراک قیلگنلر، بو وضعیت دوامی‌نی مملکت منفعتی‌گه بیلمه‌یدیلر. اولرنینگ ایتیشیچه، بوتون نامزدلر کیلیشگن صورتده، عالی محکمه جمهور رییس ایشی‌نینگ دوامی‌نی تمدید قیله آله‌دی.
ایتیش کیره‌ک‌که، جمهور رییس مملکت عالی محکه‌سی نینگ تصدیق نامه‌سی اساسیده، ایشی‌گه دوام بیرماقده و جمهورلیک ریاستی سوزلاوچیسی شاه‌حسین مرتضوی، جمهورلیک ریاستی نامزدلریگه اساسی قانونی‌نینگ مطالعه قیلیشی‌نی توصیه قیلگن.
