د هلمند ولایت مرکز لښکرګاه ښار دویمې امنیتي حوزې اړوند د یوې پوستې ۱۲ پولیس تېره شپه په مرموز ډول وژل شوي دي.
د هلمند د والي ویاند عمر ځواک سلام وطندار سره په خبرو کې د پېښې پخلی وکړ او ویې ویل، معلومه نه ده، چې د دې پوستې سرتېري څه ډول وژل شوي دي.
دی وايي، چې تېره شپه د "سره ګودر" سیمه کې د حکومت او طالبانو ترمنځ هېڅ جګړه نه شوې؛ خو سرتېري وژل شوي دي.
هلمند کې د ۵۰۵ بست زون د جنایي څېړنو رییس سمونمل توریالی روهي وایي، دغې امنیتي پوستې چې سرتېري په کې وژل شوي د څارنې بورجونه او د ارتباط خندق هم درلود؛ پر وینا یې وسله والو طالبانو د شپنیو عملیاتو له دوربین لرونکو سنایپرو په وسیله ټول سرتېري وژلي دي.
توریالي روهي وویل، له څېړنو وروسته به د پېښې څرنګوالی معلوم شي.
خو د ملي امنیت یوې سرچینې د نوم نه خپرولو په شرط سلام وطندار ته وویل، چې د "سره ګودر" امنیتي پوستې دوو پولیسو له طالبانو سره اړیکه جوړې کړې وې او خپل ۱۲ ملګرې یې وژلي او تښتېدلي دي.
دغه راز قاري یوسف احمدي، چې ځان د وسله والو طالبانو ویاند بولي وايي، د "سره ګودر" پوستې د دوی ملګرو نیولې او ۱۲ سرتېري یې په کې وژلي دي.
قاري یوسف احمدي ادعا کوي، چې ۷ میله وسلې او یو نظامي موټر یې هم له ځانه سره وړي دي.
لومړني معلومات
د هلمند ولایت چارواکي وايي، چې تېره شپه ناوخته یو پولیس سرتېري خپل ۱۲ سنګروال په ګولیو ویشتلي او وژلي دي.
د والي ویاند عمر ځواک سلام و طندار ته وویل، پېښه د لښکرګاه دویمې امنیتي حوزې اړوند په "سره ګودر" سیمه کې رامنځته شوې ده.
دی وايي، چې قاتل تښتېدلی او له طالبانو سره یو ځای شوی دی.
ځواک وویل، د پېښې انګېزه معلومه نه ده؛ پولیسو پلټنې پيل کړي دي.
په داسې حال کې یو پولیس سرتېری خپل سنګروال وژني، چې د کورنیو چارو وزارت ۶ میاشتې کېږي د پولیسو په لیکو کې د سمون په پروګرام کار کوي.
