بوگون 7- سپتامبر خلق ارا سواد کونیگه تینگ دیر. اوشبو کون هلمند ولایتیده نشانلدی. ایتیلیشیچه، ولایت بویلب 140 مکتبنینگ ایشیگی اوقووچیلر یوزیگه یاپیب قوییلگن بیر چاغده ولایتده سواد کونی نشانلماقده.
انه شو مناسبت بیلن هملند ولایتیده اوتکزیلگن ییغینده سوزلهگن مدنی جماعهچیلیک فعالی سردارمحمد همدردنینگ ایتیشیچه، اوقووچیلر یوزیگه یاپیلگن مکتبلرنینگ کوپچیلیگی ولایتنینگ شمالی حدودیده جایلشگن و مرکزی حکومت هم اوتگن اون اوچ ییلده مذکور حدودده مکتبلرنی فعال قیلیشگه موفق بولمهگن.
او افغانستان معارف وزیرلیگی مسؤوللریدن مساله اوچون جدی اعتبار قرهتیشلرینی سورهگن. جناب همدرد، ولایت معارف ادارهسی مذکور مکتبلر ایشیگی اوقووچیلر یوزیگه آچیلیشنی ایستهگن تقدیرده، مدنی جماعهچیلیک فعاللری همکارلیک قیلیشنی ایتگن.
ولایت معارف ادارهسینینگ تدریسی اورین باسری سردارمحمد کاکرنینگ سوزلریگه کوره، ولایت بویلب فقط 105 مکتب ایشیگی یاپیقلیگیچه قالماقده.
عین حالده، جناب کاکر نیچه مرته ایریم ادارهلر همده مدنی جماعهچیلیک تشکیلاتلری بیلن اوچرهشیب اوشبو مکتبلر ایشیگی قیتهدن شاگردلر یوزیگه آچیلیشی اوستیده بحث قیلگنلر.
هلمند معارف ادارهسینینگ تدریسی اورین باسریگه کوره، ولایتنینگ شمالی حدودیده مکتبلر ایشیگی یاپیقلیگینی اساسی سببی نابرقرارلیکلردن کیلیب چیقهدی.
ولایت بولیب 150مینگ اوقووچی درس اوقیش بیلن بند، اولردن 30 مینگی قیزلردن عبارت ایکنلیگی ایتیلهدی.
هلمند ولایتینینگ مدنی جماعهچیللیک فعاللری، هنوزگچه هم افغانستان معارف وزیرلیگی تامانیدن بو توغریده برنامه اوتکزیلمهگن بیر پیتده خلق ارا سواد کونینی نشانلنگنلر.
