هلمند ولایتی‌نینگ مارجه تومنی «کمپ» منطقه‌سیده یالغیز اوچ عسکر موجود. سلام‌وطندارنینگ خبرچیسی‌گه کوره، مذکور عسکرلر کیچه تامانیدن نوبت‌ده پیره قیلیب، اوشبو منطقه امنیتی‌نی تأمین‌له‌یدی.
اوشبو عسکرلرنینگ سلام‌وطندارگه ایتیشیچه، هیچ قچان سنگرنی قوییب یوبارمه‌ی و سونگی قانی‌گچه مملکت‌دن دفاع قیله‌دیلر. اولر ییگولیک ماده و حربی جهاز کم‌لیگی‌دن شکایت قیلیب ایتیشیچه، منطقه امنیتی‌نی تأمین‌لش خصوصیده، ینگی کوچ و حربی جهاز لازم.
مارجه هلند ولایتی‌نینگ ناتینچ تومن‌لریدن بیری دیر و طالب‌لر اوشبو تومن‌ده کینگ شکلده فعالیت قیله‌دی. عین حالده، طالب‌لر کمیده 25 کون آلدین اوشبو تومن اوستیگه هجوم اویوشتیریب بیر قسمتی‌نی نظارت‌گه آلگن و توقنه‌شوو حاضرگچه امنیتی کوچلر بیلن مذکور گروه اورته‌سیده دوام ایتماقده.
سلام‌وطندار خبرچیسی‌نینگ ایتیشیچه، مارجه تومنی امنیتی کوچلری‌نینگ ینگی کوچ و حربی جهازگه احتیاجی بار. مارجه تومنی اوروش میدانیده‌گی امنیتی کوچلریدن بیرقطاری‌نینگ ایتیشیچه، ایکی هفته طالب‌لر قورشاویگه قالگن‌لر و شونچه مدت‌ده هیچ نرسه ییمه‌ی سنگرلریدن دفاع قیلگن‌لر.
اوشبو قرارگاه عسکرلری‌نینگ سلام‌وطندارگه ایتیشیچه، مذکور منطقه‌ده اولرگه ینگی کوچ و ییگولیک ماده یوباریلیشی خصوصیده قرار قیلینگن ایکن، بیراق حاضرگچه اوشبو یاردملردن خبر یوق دیر.
هلمند ولایتی کینگشی امنیتی ترماق مسؤولی احمد شاکر، اوشبو قیین‌چیلیک‌لرنی تأیید قیلیب مرکزی رسمی‌لرگه ایتیشیچه، «منطقه‌نی سقله‌آلمه‌گن صورتده هم، کمیده امنیتی کوچلرنینگ جانی‌نی خطرگه قویمنگ‌لر».
بیراق هلمند ولایتی نظم عامه 8- لوا قومندانی خلیل‌الرحمان جوادنینگ ایتیشیچه، امنیتی کوچلر قورشاوگه قالگنده، بونده‌ی قیین‌چیلیک بار ایکن. اونینگ ایتیشیچه، اوشه زمانده خوفسیزلیک کوچلری اوته‌دیگن منطقه‌لرده ماین ییرلشتیریلگنی باعث، امنیتی کوچلر قورشاونی سیندیره‌آلمه‌گن و حاضر بو قیین‌چیلیک‌لر حل بولگن.
505 بُست زونی‌نینگ قومندانی عصمتالله دولتزی‌نینگ ایتیشیچه، مارجه تومنی‌ده طالب‌لر رقمی کم دیر، بیراق کم بولگنده هم اساسی لایحه‌لرنی قولگه آلگن. دولتزی هلمند ولایتی ناتینچ منطقه‌لریده امنیتی وضعیت یخشی‌لنگنی‌دن خبر بیریب ایتیشیچه، مذکور ولایت‌ده تیزلیک‌ده ایجابی اوزگریشلر کورینه‌دی.
شونده‌ی بیرحالده، کمیده اون کون آلدین (1 قوس) افغانستان بوییچه خلق ارا کوچلری‌نینگ باش قومندانی جان کمپل، هلمند امنیتی یخشی‌لنیشی خصوصیده، جدی سعی و حرکت بولیشی‌دن خبر بیرگن ایدی.
