بوگون «دوشنبه» نماینده‌لر کینگشی‌نینگ عمومی ییغینیده، نماینده‌لر هلمند ولایتی یشاوچیلری‌نینگ تینچلیک ایستش و مدنی حرکتی دن حمایت بیلدیردی. نماینده‌لر کینگشی باشلیغی عبدالرؤوف ابراهیمی، هلمند اهالیسی‌نینگ مدنی حرکتی نی حق دیب و شونینگ‌دیک، حکومت‌دن هلمند یشاوچیلری‌نینگ ایستک‌لریدن حمایت قیلیشی‌نی سوره‌دی.
عین حالده، بلخ و زابل ولایتی‌نینگ قطار مدنی فعالی و یاشلری هلمند اهالیسی دن حمایت قیلیش نیت‌ده تحصن خیمه قورگن‌لر. اولر طالبان گروهی دن اهالی‌نی اولدیریش دن قول تارتیب و تینچلیک لایحه‌سیگه قوشیلیش‌لرینی سوره‌دیلر.
اولرنینگ ایتیشیچه، تینچلیک ایستش و ناتینچلیک‌که قرشی ناراضیلیک بیلدیریش یالغیز هلمند اهالیسی اوچون ایمس، بلکیم بوتون مملکت یشاوچی‌لری تینچلیک حمایت قیلیش اوچون ناتینچلیک‌که قرشی ناراضیلیک بیلدیرگن‌لر.
هلمند یشاوچی‌لری ناراضلیک و تینچلیک ایستش خیمه‌سی قورگن‌لریدن اون کون اوتماقده. لیکن اولرنینگ ناراضلیک‌لری یالغیز تینچلیک ایستش خیمه‌سی بیلن توخته‌ب قالمه‌یدی. طالبان گروهی اولرنینگ تینچلیک ایستش‌لریگه رد جواب بیرگنیدن سونگ، اعتراضچیلر آچلیک اعلان قیلیب و بیرقطاری وضعیت‌لری یامان بولگنیدن کیین، کسلخانه گه یوباریلگن و شو یوزه‌دن دین عالم‌لری آچلیک اعلان قیلیش دین گه قرشی دیب و بونگه نقطه قوییش‌لرینی ایسته‌گن.
دین‌عالم‌لری اوتگن کون ناراضچی‌لر بیلن اوتکزگن ییغینیده 15 کیشی‌لیک بیر کمیسیون قورگن و بو کمیسیون هلمند ولایتی‌نینگ دین‌عالم‌لری بیلن تینچلیک خصوصیده سوزلشه‌دی.
جاری ییل حمل آی‌نینگ 3 کونی‌ده هلمند مرکزی لشکرگاه شهری‌نینگ بیرینچی ناحیه‌سیده موترده ییرلشتریلگن پارتلاوچی ماده پارتله‌شی نتیجه‌سیده اونلرچه کیشی اولیب و اونلرچه کیشی یره‌لندی و اوندن سونگ، هلمند اهالیسی ناراضیلیک بیلدیریب تحصن خیمه قوردیلر.
