اوتگن کیچه قورال‌لی طالب‌لر گرشک تومنی اوستیگه هجوم اویوشتیریب و مذکور تومن‌ده 4 امنیتی پوسته‌نی هدف قرار بیرگن. امنیتی رسمی‌لرنینگ ایتیشیچه، امنیتی کوچلر بیلن طالب‌لر اورته‌سیده یوزبیرگن توقنه‌شووده 6 پولیس هلاک بولیب و باشقه 11 پولیس یره‌لنگن. قورال‌لی طالب‌لرنینگ قربانلیگی توغری‌سیده حاضرگه‌قدر معلومات قولگه کیریتیلمه‌گن.
گرشک تومنی‌نینگ پولیس قومندانی محمداسمائیل، اوشبو خبرنی تأیید قیلیب ایتیشیچه، توقنه‌شوو آلتی ساعت دوام قیلگن و حاضر وضعیت عادی حالت‌گه قیتیب و امنیتی کوچلر منطقه‌ده جایلشگن.
شونینگ‌دیک، هلمند ولایت کینگشی‌نینگ آگاه‌لنتیریشیچه، کیله‌جک 48 ساعت‌ده هوایی و خاص کوچلر منطقه‌گه کیلمه‌گن تقدیرده، هملند سقوط قیله‌دی. مذکور ولایت‌ده اوتکزیلگن خبر بیر ییغینده ولایتی کینگش باشلیغی محمدکریم اتل‌نینگ کوپه‌یتیریشیچه، ولایت‌نی 12 منطقه‌سیده توقنه‌شوولر دوام ایتماقده و بو توقنه‌شوولرده حربی و پولیس کوچلری‌نینگ قولی‌دن هیچ نرسه کیلمه‌یدی.
هلمند ولایت کینگشی باشلیغی‌نینگ ایتیشیچه، اولرنینگ قولگه کیریتگن رقم‌لری اساسیده، حاضرگچه 92 پولیس هلاک بولیب و یره‌لنگن و قورال‌لی طالب‌لر حاضرگه‌قدر، مذکور ولایت‌نینگ گرشک، نادعلی، مارجه تومن‌لری و قتناو یول کندکی‌گه تیگیشلی 12 امنیتی پوسته اوستیگه حاکم بولگن.
آتی فاش ایتیلیشی‌نی ایستمه‌گن بیر رسمی‌نینگ سلام‌وطندارگه ایتیشیچه، بو توقنه‌شووده 16 پولیس هلاک بولگن و باشقه 4 پولیس طالب‌لرنینگ قولی‌گه توشگن. مذکور امنیتی رسمی‌گه کوره، تورت امنیتی پوسته بوتونله‌ی قورال‌لی طالب‌لرنینگ نظارتی‌گه اوتگن.
گرشک تومنی سپین‌جومات منطقه‌سی یشاوچی‌لریدن بیری محمدگل‌نینگ ایتیشیچه، اوتگن کیچه کمیده 50 طالب امنیتی پوسته‌لر اوستیگه هجوم اویوشتیرگن و توقنه‌شوو یکونلنگنی‌دن کیین، نیچه پولیس‌نی اوزلری بیلن آلیب کیتگن.
سلام‌وطندارگه ییتیب کیلگن گزارش‌لر اساسیده، طالب‌لر هلمند- قندهار قتناو یولی‌نی سقلاوچی کندک اوستیگه هجوم اویوشتیریب، یول‌نی توسگن‌لر.
اوشبو یول هیداوچی‌لری‌نینگ ایتیشیچه، منطقه‌ده امنیتی کوچلر بیلن قورال‌لی طالب‌لرنینگ اورته‌سیده‌گی توقنه‌شوو حاضرگه‌قدر دوام ایتماقده. اولرگه کوره، ایرته‌لب ساعت 8 دن بویان هیچ بیر نقلیه واسطه بو یول‌دن اوتمه‌گن.
طالب‌لر، حاضرگچه بو توغریده هیچ نرسه دیمه‌گن و شونینگ‌دیک، هلمند امنیه قومندانی، حاضرگه‌قدر سوراقلرگه جواب بیرمه‌گن.
