هرات ولایتی اوبه، چشت و پشتون زرغون تومنلری اولرچه یشاوچیسینینگ ایتیشیچه، چشت- هرات قتناو یولی بوزیقلیگی باعث، کونده 10 الی 20 کیشی جان بیرهدیلر. اوشبو یشاوچیلر، ولایت مرکزی بیلن تومنلر قتناو یولی قیر بولیشی خصوصیده، حکومت دقت سیزلیگی باعث، شنبه کون هرات ولایت بناسی اونگیده ناراضیلیک نمایش یولگه قویگنلر.
اعتراضچیلرنینگ ایتیشیچه، مرکزگچه اوشبو قتناو یول فاصلهسی کمیده 160 کیلومتر بولگن، بیراق یول بوزیقلیگی باعث، یوللاوچی تاشیدیگن موترلر شو فاصلهنی اون ساعت یورهدی.
اولرنینگ ایتیشیچه، بو یول قیر بولگن صورتده، شونچه پیت ایکی ساعتگه کمهییشی ممکن.
شونینگدیک، اعتراضچیلرنینگ ادعاقیلیشیچه، دیمک اوتکن ییللر جریانیده، حکومت رسمیلری نیچه مرته اوشبو یولگه قیر توکیلیشیدن خبر بیرگن، بیراق حاضرگچه ایشی عملی صورتده باشلنمهگن.
اوشبو ناراضچیلرنینگ ایتیشیچه، بیرقطار کسللر و حاملهدار عیاللر دارولش اوچون هرات مرکزی تامان بارهدیگن چاغیده، یول بوزیقلیگی باعث، جان بیرهدیلر.
هرات- چشت قتناو یولی نیچه تومننی هرات مرکزی بیلن باغلشیگه قوشیمچه، کونده اونلرچه یوللاوچی تاشیدیگن موتر بو یولدن هرات مرکزیگه کیلیب و کیتهدی. شونینگدیک، کونده اوشبو تومندن اونلرچه تُن مرمر تاشی شو یولدن شهر انتقال بیریلهدی.
ناراضچیلرنینگ آگاهلنتیریشیچه، حکومت رسمیلری اولرنینگ ایستهگیگه ایجابی جواب بیرمهی و بول یولنی قوریلیشیگه دقت قیلمهگن صورتده، مذکور اوچ تومن قتناو یولینی هرات مرکزیگچه ترافیک اونگیده توسیشلری ممکن.
عین حالده، عامه منفعت وزیری محمود بلیغ، خلق ناراضیلیک نمایشی جریانیده ولایت والیسی محمدآصف رحیمی بیلن تلیفون علاقه قوریب مذکور یولگه قیر توکیلیشی خصوصیده سوزلهشیب ایتیشیچه، اوشبو لایحه ایش حجتی یکونلهنیب و سالیق وزیرلیگیگه یوباریلگن و مذکور وزیرلیک تامانیدن تصدیق لنگنیدن کیین، اوشبو یول ایشی تیزلیکده باشلهنیشی ممکن.
