هرات ولایتی بوییچه عیاللر ریاستی مسؤوللری نینگ ایتیشیچه، اوتگن ییل گه نسبتن جاری ییل نینگ بیرینچی 6 آیی‌ده مذکور ولایتده عیاللرگه قرشی زوروانلیک کمه‌یگن.
جنسیت اساسی گه باغلیق هرقنده‌ی زوروانلیک عیاللرگه روحی و روانی، جنسی و فیزیکی زیان ییتکیزگن صورتده، عیاللرگه قرشی زوروانلیک سنله‌دی.
بیراق، افغانستان جماعه‌سیده عیاللرگه قرشی زوروانلیک نینگ اصلی عاملی، بیلیم‌سیزلیک، عیاللرگه نسبتن اجتماع ده ناتوغری ایشانچ‌لر و جماعه‌ده حاکم رسم‌ورواجلر دییله‌دی.
هرات ولایتی بوییچه عیاللر ریاستی باشلیغی انیسه سروری نینگ ایتیشیچه، اوتگن ییل نینگ سونگی اوچ آیی گه نسبتن جاری ییل نینگ بیرینچی 3 آیی ده هرات ولایتیده عیاللرگه قرشی زوروانلیک‌لر کمه‌یگن.
خانم سروری نینگ ایتیشیچه، قویاش 1397- ییل نینگ سونگی اوچ آیی‌ده مذکور ریاست ده عیاللرگه قرشی 196 زوروانلیک قضیه‌سی رویخط‌گه آلینگن ایکن، بیراق بو رقم جاری ییل نینگ بیرینچی 3 آیی ده 144 واقعه گه آزه‌یگن.
لیکن، هرات ولایتی بوییچه عیاللر ریاستی باشلیغی نینگ ایتیشیچه، جاری ییل نینگ ایکینچی اوچ آیی ده عیاللرگه قرشی زوروانلیک‌لرنینگ رقمی اوزگرمه‌گن.
اونگه کوره، جاری ییل ایکینچی اوچ آیی‌ده عیاللرنی کلتک‌لش روزوانلیک نینگ کوپ قسمی نی تشکیل بیره‌دی و رقمی ایسه 98 واقعه گه ییتیشه‌دی.
هرات ولایتی بوییچه عیاللر ریاستی باشلیغی نینگ ایتیشیچه، عیاللرگه قرشی زوروانلیک‌لرنینگ کمه‌ییش سببی عیاللرنینگ ظرفیتی کوچه‌یتیریلیشی، بیلیم میزانی یوقاری کیتیشی، اورگه‌تیش و تربیه‌لش و جماعه توشونچه‌سیده ایجابی اوزگریش کیریتیلیشی گه بولگن.
عین حالده، هرات ولایتیده عیاللر حقوقی فعالی سومیتا رضایی نینگ ایتیشیچه، عیاللرگه نسبتن عایله‌لرنینگ توشونچه‌لری اوزگریشی، آکادمیک محیط‌لرده عیاللرنینگ حضوری کوپه‌ییشی، عیاللرنینگ مالی ایرکین‌لیگی، عیاللر و ایرکک‌لر اوچون میدیالر آرقه‌لی آگاه‌لنتیریش برنامه‌لر نشر ایتیلیشی عیاللرنینگ وضعیتی یخشی‌لنیب و زوروانلیک‌لر کمه‌ییشی گه سبب بولگن.
بیراق، هرات ولایتی بوییچه عیاللر حقوقی فعاللریدن بیرقطاری، مذکور ولایتده عیاللرگه قرشی زوروانلیک کمه‌یگنینی رد قیله‌دیلر.
هرات ولایتیده عیاللر حقوقی فعاللریدن باشقه بیری عزیزه خیراندیش نینگ ایتیشیچه، عیاللر اوچون عدلی و قضایی اداره یوقلیگی، ناتینچلیک و بو قضیه‌لر توغری شکلده تیکشیریلمه‌گنی، عیاللرگه قرشی زوروانلیک‌لر رقمی یاشیرین قالیشی گه سبب بولگن.
هرات ولایتی: سحر رادیوسی نینگ گزارشی
