اخیرگی بیر هفته‌ده هرات ولایتی‌نینگ ایریم مکتب‌لری اوقووچی‌لری و ینه اوقیتووچی‌لری زهرلنتیریلدی و هنوزگچه هم ملی کوچلری حادثه عامل‌لرینی تانیب قول‌گه آلیش‌گه موفق بولمه‌گن.
اوقووچی‌لر همده اوقیتووچی‌لرنی آلدین – کیین زهرلنتیریش مساله‌سی ولایت دولت محلی رسمیلری و اهالی اورته‌سیده فرقلی قره‌ش‌لر و شک و تردیدلرنی توغدیرگن. بعضی‌لر مذکور واقعه ولایت معارف ادارهسیگه کیلتیریلگن اوزگریش‌دن ایلدیز آلیشینی ایتیب، حادثه معارف اداره‌سی ایچیده معین گروه‌لر تامانیدن پلانلشتیریله‌دی دیگنلر.
هرات ولایت معارف اداره‌سی نینگ باشلیغی عبدالرازق احمدی، اوقووچی‌لر زهرلنتیریلیشی اوچون ریاست‌ده مخصوص گروه قولی بارلیگینی رد قیلمی، حادثه آرتیده ییریک جریان‌لر طوطیه‌سی بارلیگینی اظهار قیلگن.
اونگه کوره، ایریم گروه‌لر ولایت معارف اداره‌سینی بدنام قیلیب قیین‌چلیککه روپه ره قیلیش‌گه سعی وحرکت ایته‌دیلر.
هرات ولایت کینگشی‌نینگ بیر قطار اعضالری آلدین – کیین یوز بیره دیگن زهرلنتیریش واقعه‌سی اوچون ولایت معارف ادارهسیگه کیلتیریلگن اوزگریش سبب بولگن لیگینی معلوم قیلگنلر.
هرات ولایت کینگشی‌نینگ اعضاسی سیدعظیم کبرزانی، یوز بیرگن زهرلنتیریش‌لرده هیچ قنده‌ی تلفات روی بیرمه‌گن؛ زهرلنتیریشدن اساسی نیت اوقووچی‌لری همده عیاله‌لر اورته‌سیده بیر خواطر توغدیریشدن بولک نرسه ایمس دیگن.
بیراق ولایت امنیتی رسمیلریگه کوره، پولیس‌نینگ آلیب بارگن تیکشیروویده اوشبو حادثه‌لر کوپینچه اوقووچی‌لر یا – ده اوقیتوچی‌لر تامانیدن مدیریت ایتیله‌دی.
هرات پولیس قوماندانلیگی‌نینگ سوزلاووچی‌سی جناب عبدالرووف احمدی، مذکور حادثه آرتیده کیم نینگ قولی بارلیگینی برچه‌میز بیله‌میز؛ اما هنوزگچه قولیمیزده انیق حجت بولمه‌گن لیگی باعث هیچ کیم نی حبس‌گه آلمه‌گن میز دیدی.
گزارش‌لرده، بیر هفته جریانیده کمیده 400 اوقووچی زهرلنتیریلگنی ایتیله‌دی. ایتیلیشیچه، هرات ولایتی‌ده قیزلرنی زهرلنتیریش‌نینگ بیشینچی موردیده بوگون (دوشبنه) انجیل ولسوال‌لیگی «نوین» قیشلاغی قیزلر مکتبی‌نینگ ییتمیش قیز اوقووچی‌سی زهرلنتیریلگن‌دن سونگ شفاخانه‌گه ییتکزیلگن.
