د هرات ښار عمومي سړک ته څېرمه له ترهګرو سره په مخامخ جګړه کې د امنیتي او دفاعي ځواکونو ۶۲ اخېستل شوي تصویرونه نندارې ته وړاندې شول.
هرات کې د سیمهییزو ارګانونو اړوند د ولسي ملاتړ د دفتر مسوول غلامحضرت مشفق د دغه نندارتون جوړولو موخه، د امنیتي ځواکونو له اتلولیو د خلکو ملاتړ یادوي.
هغه ټینګار کوي چې دا ډول پروګرامونه د جګړو جبهو کې د امنیتي ځواکونو روحیه لوړوي.
د نوموړي په وینا، د جګړې په ډګر کې د امنیتي ځواکونو له څو سوو تصویرونو نه یې ۶۲ غوره کړي او نن یې د هغوی د قربانیو د ستاینې او لا هڅونې په موخه نندارې ته ايښي دي.
په همدې حال کې د هرات والي عبدالقیوم رحیمي د دغه نندارتون په پرانېستل کېدو سره امنیتي ځواکونو ته ډاډ ورکوي چې په هر ډول حالاتو کې به له امنیتي ځواکونو ملاتړ وکړي.
د هرات امنیه قوماندان امینالله امرخېل او د پوځ د لومړۍ لوا قوماندان زیارتشاه عابد هم د دغه پروګرام له جوړولو د هرکلي ترڅنګ وايي، دا ډول پروګرامونه امنیتي ځواکونو ته انګېزه ورکوي چې د وسلهوالو ډلو پروړاندې په لوړه روحیه جګړه وکړي.
اړوند مطالب:
کمپاین او ملاتړ؛ هراتۍ مېرمنو امنیتي ځواکونو ته وینه ورکړه
د روحالله څوارلس کلن امنیتي خدمت او خاطرې
«له امنیتي ځواکونو سره بې سارې مینې سرتېری کړم»
د هرات امنیه قوماندان امینالله امرخېل وویل، له امنیتي ځواکونو نه د خلکو ملاتړ لامل شوی چې په هرات کې نسبي امنیت ټینګ شي او د خلکو دا ډول مینه سرتېرو ته د دې انګېزه ورکوي چې له هېواده لا هم په مېړانه دفاع وکړي.
په هرات کې د پوځ د لومړۍ لوا قوماندان زیارتشاه عابد بیا خلکو ته ډاډ ورکوي چې په روان کال کې به نه یوازې تر خپلې ولکې لاندې سیمې وساتي، بلکې د وسلهوالو ډلو تر ولکې لاندې سیمې به هم ترې ونیسي.
د هرات اوسېدونکي هم له امنیتي ځواکونو نه په لا ډېر ملاتړ ټینګار کوي او له حکومته غواړي چې باید د امنیتي ځواکونو د قربانیو کورنیو وضعیت ته لا ډېر پام وکړي.
