.jpg)
ننگرهار ولایتی بوییچه ملی خوفسیزلیک ریاستی نینگ اعلان قیلیشیچه، مذکور ولایت نینگ خوگیانی تومنیده افغان حربی کوچلری تامانیدن یولگه قوییلگن خاص بیر عملیات نتیجه سیده داعش گروهی نینگ 3 قومندانی شامل 22 جنگریسی هلاک ایتیلگن.
بوگون «سه‌شنبه، 10- ثور» مذکور ریاست تامانیدن نشر ایتیلگن خبرنامه‌ده ایتیلیشیچه، اویوشتیریلگن عملیات‌ده داعش گروهی نینگ 4 اونملی مرکزی هم نابود قیلینگن.
میدیالردن بیری گه صحبت بیرگن ننگرهار حاکمی سوزلاوچیسی عطاالله خوگیانی نینگ ایتیشیچه، اوشبو عملیات داعش گروهی فعالیت قیله‌دیگن زاوه منطقه‌سیده 24 ساعت آلدین باشلنگن.
ننگرهار حاکمی سوزلاوچیسی نینگ کوپه‌یتیریشیچه، بو عملیات جریانیده ملی خوفسیزلیک خاص کوچلری و تینچ اهالی گه زیان ییتمه‌گن.
عین حالده، خوگیانی تومنی یشاوچیلری‌نینگ ایتیشیچه، ایکی کوندن بویان افغان حربی‌لری و داعش جنگریلری آره‌سیده آتیشمه باشلنگن و محل یشاوچیلرینی جدی شکلده خواطرگه سالگن.
میدیاگه صحبت بیرگن خوگیانی تومنی یشاوچیلریدن بیری عارف‌الله نینگ ایتیشیچه، ملی خوفسیزلیک ریاستی نینگ خاص کوچلری ایکی کون آلدین زاوه منطقه‌سیگه کیرگن‌لر و ایکی تامان آره‌سیده یوز بیرگن آتیشمه‌لر اوتگن کیچه گچه دوام قیلگن.
داعش گروهی حاضرگچه بو توغریده هیچ نرسه دیمه‌گن.
ننگرهار ولایتی نینگ خوگیانی تومنی گه تیگیشلی زاوه منطقه‌سیده داعش و طالبان گروهی نینگ جنگریلری کینگ شکلده فعالیت قیله‌دیلر و ایریم پیت‌لر افغان حربی‌لری گه قرشی اوروشه‌دیلر.
