مملکت اقتصاد وزیری عبدالستار مراد دوشنبه کونی کابلده یوزکونلیک برنامهسینی ارائه ایتدی.
جناب مرادنینگ ایتیشیچه، اوتکن 14 ییلده مملکتگه کورسهتیلگن یاردملرگه قرهمی، بیراق حاضرگه قدر افغانستان خلقینینگ 36 فایزی قشاقلیکده یشهیدی.
جناب مرادگه کوره، انه شو سبب مملکتده قشاقلیک ایلدیزینی تاپیش بو وزیرلیکنینگ یوزکونلیک برنامهسینینگ بیرینچی لایحهسیگه کیرهدی.
اونگه کوره، اوتکن ییللرده اقتصاد کینگهییشی خلقنینگ اقتصادی وضعیتی گه اوزگریش کیلتیرمهگن، شونینگ اوچون اقتصاد وزیرلیگی مملکتده قشاقلیک عاملینی تاپیشگه قرار قیلگن.
اقتصاد وزیری نینگ اورغولشیچه، مملکتده قشاقلیک ایلدیزی تاپیلمهگن صورتده، افغانستان اقتصادی برنامهلری کیلهجکده قیین چیلیککه روپه ره بولهدی.
اقتصاد وزیریگه کوره، مملکت ولایتلری اینیقسه هرات، بلخ، قندهار، و بامیان ولایتلریده اقتصادی وضعیت زیانینی تانیش، نا دولتی اداره لر تیزیمینی تیکشیریش، اوشبو ادارهلرده ملی ییغین اوتکزیش، ایچکی و تشقی نا دولت ادارهلرنی رویخطگه آلیش، اولرنینگ فعالیتلرینی تیکشیریش و افغانستان اوچون اون ییللیک گزارشنی توزه تیش اقتصاد وزیرلیگی نینگ یوزکونلیک ایشی برنامهلریدن سنلهدی.
شونینگدیک، منطقهیی اقتصادی همکارلیکلر ادارهلری تاثیری میزانینی یوقاری کوتاریش، اقتصاد وزیرلیگیده معلوماتی تیزیمینی فعال قیلیش و کوچلنتیریش، رواجلنتیریش لایحهلرنی تیکشیریش و بیرلشتیریش، تکلیف بولینگن لایحهلرنی تیکشیریش و تحلیل قیلیش و بو وزیرلیکده قابلیتلرنی آشیریش، ایچکی مصلحتچیلرنی تیکشیریش اقتصاد وزیرلیگی نینگ یوزکونلیک باشقه ایش برنامهلری دییلهدی.
