د افغانستان کرکټ بورډ په نوښت پیل شوې د کورني کرکټ تر ټولو سترې (الکوزي سید جمال الدین افغان) ګریډ ون ۵۰ اوریزه ولایتي کرکټ سیالۍ نن دوشنبه (می ۳۰ مه) د ننګرهار منتخبې ولایتي لوبډلې په اتلولۍ پای ته ورسیدې.
د سیالیو فاینل لوبه نن د روان ټورنامنټ په دوام د لومړي ځل له پاره په کابل کرکټ نړیوال لوبغالي کې ترسره شوه، چې په کې ننګرهار په ۹ ویکټو لغمان لوبډلې ته ماتې ورکړه.
د ننګرهار لوبډلې په ګټه کریم صادق د ۴ ویکټو اخیستلو ترڅنګ د روان ټورنامنټ دویمه سلیزه پوره کړه، چې په ۱۰۱ منډو ټپي شو او په پای کې بیا د لوبې غوره لوبغاړی هم اعلان شو.
د افغانستان کرکټ بورډ له خوا د ورکړل شویو معلوماتو له مخې، په فاینل لوبه کې ننګرهار لوبډلې د پچې ګټلو وروسته لغمان لوبډلې ته د لومړۍ لوبې کولو بلنه ورکړه، چې کامیابه پریکړه ثابته شوه.
لغمان لوبډلې په لومړي وار کولو سره د وحید الله شفق د ۹۵ منډو په مټ ۲۳۵ منډې جوړې کړې، چې د ننګرهار له پاره کریم صادق او باطن شاه څلور څلور ویکټې ترلاسه کړلې.
د هدف ترلاسه کولو په موخه ننګرهار د نجیب ترکي او شبیرنوري په مټ ښکلې پیل درلوده، چې په ۵۲ منډو کې نجیب ترکي د ۲۵ منډو جوړولو وروسته خپل ویکټ له لاسه ورکړه، خو له کپتان سره د ملګرتیا له پاره کریم صادق میدان ته راښکته شو او د اتلولۍ له پاره یې د وحید الله شفق ۹۵ منډې او د لغمان لوبډلې هیلې په اوبو لاهو کړې، چې هدف یې په ۳۵ م اور کې ترلاسه کړ.
د الکوزي سید جمال الدین افغان لومړۍ درجه ولایتي کرکټ سیالۍ روانه میاشت د ۱۰ مخکښه ولایتي کرکټ لوبډلو ترمینځ د ننګرهار په غازي امان الله خان او بهسودو کرکټ لوبغالو کې پیل شوې.
د سیالیو په پای کې د لغمان منتخبې لوبډلې اوپنر بیټسمین ناصرخان په ۴۰۰ منډو ترټولو مخکښه بیټسمین او د خوست لوبډلې بالر مجیب په ۱۶ ویکټو ترټولو مخکښه بالر وو.
دغه راز د اتلې ننګرهار منتخبې ولایتي لوبډلې کپتان سپینر شبیرنوري، چې وروسته دغیرقانوني بالینګ له کبله له بندیز سره مخ شو په ټورنامنټ کې د خوست لوبډلې خلاف په لومړۍ لوبه کې ۶ ویکټې ترلاسه کړې، چې تر ټولو غوره بالر ثابت شو.
دغه راز په یوه لوبه کې د زیاتو منډو کارنامه هم د اتلې ننګرهار منتخبې لوبډلې لوبغاړي کریم صادق وه، چې په ۱۴۲ ناسوځیدلو منډو جوړولو بریالی شو.
د ټورنامنټ پرمهال یواځې کریم صادق او ناصرخان په دوه دوه سلیزو چې ترڅنګ یې بهیر، شبیرنوري، رحمان ګل، ابراهیم ځدران، درویش رسولي، او ضیا الحق په سلیزو جوړولو بریالي شول.
