په ننګرهار کې یوشمېر ښځینهوو د افغان ښځو شبکې له لوري په يوه خبري ناسته کې د سولې په روان بهير کې د ښځو د سمبوليک ګډون په اړه شکايت وکړ.
دوی پر مسوولو ادارو نيوکه کوي چې مېرمنو ته د سولې په بهير کي کمه ونډه او سمبولیکه ونډه ورکړل شوې ده.
ثنا او اديبا وايي، څرنګه چې مېرمنې د کورنۍ مهم غړي بلل کېږي؛ نو کولای شي د سولې په اړوندو غونډو کې هم مهم رول ولوبوي.
دوی له سلاموطندار سره په خبرو کې ویلي چې د سولې په روان بهیر کې باید نه یوازې دوی ته پوره ونډه ورکړل شي، بلکې تېرې لاستهراوړنې یې هم وساتل شي.
د دغو مېرمنو په وینا، په ټولنه کې دوی ته په کمه سترګه کتل کېږي او په وینا یې، ښځې د سولې په ګډون د هېواد په ټولو پروسو کې مهم رول لوبولی شي او پهکار ده چې نور یې سمبولیکه ونډه په رښتینې هغې بدله شي.
په ختیځ کې د افغان ښځو شبکې سیمهییز مسوول خاناقا عرمل وايي، ځوانان او مېرمنې کولای شي د سولې په روان بهیر کې مثبت بدلون راولي.
د نوموړي په وینا، حکومت باید د سولې په روان بهیر کې د ښځو رول او لاستهراوړنو ته پام وکړي او اړتیا ده چې ښځینه او نارینه دواړه په ټولنه کې د سولې لپاره د عامه ذهنیت جوړولو په برخه کې ګډ کار وکړي.
دا چې هر انسان او هر افغان د سولې تږی دی او غواړي دغې هیلې ته ورسېږي؛ نو ټول وګړي که هغه نارینه یا ښځینه دي، باید د سولې راتلو لپاره خپل غږ اوچت کړي.
د ننګرهار اوسېدونکې پر ښوونکیو، استادانو، رسنیو، مدني ټولنو او حکومت هم غږ کوي چې په هېواد کې د جګړې د پای ته رسېدو او د سولې راتلو لپاره د زړه له تله کار وکړي او افغانان له روان وضعیت نه وژغوري.
مرام راډیو ـ ننګرهار
