د ننګرهار چارواکي وايي، تېره شپه د ملي امنیت ځواکونو په ننګرهار پوهنتون کې ۴ تنه داعش ته د تبلیغاتو په تور نیولي دي.
د والي ویاند عطاالله خوګیاڼي سلام وطندار ته وویل، نیول شوي کسان تېره شپه له نامعلوم ځای نه د ننګرهار پوهنتون ته ورغلي؛ خو د ملي امنیت ځواکونو له نورو مشکوکو کسانو سره یو ځای نیولي دي.
هغه وايي، له یادو ۴ کسانو سره یو ځای نیول شوي کسان له څېړنو وروسته بېرته خوشې شويدي.
په ټولنیزو رسنیو کې داسې اوازې هم دي چې تېره شپه د ننګرهار پوهنتون کې د لسو په شاوخوا کې داعشپلوه محصلان نیول شوي؛ خو د ننګرهار چارواکي دا خبره ردوي.
ننګرهار پوهنتون کې د داعش سره د تړاو په تور د کسانو د نیول کېدو خبره نوې نهده؛ شاوخوا درې کاله وړاندې په همدې پوهنتون کې د داعش او طالبانو په ملاتړ لاریونونه هم شوي وو چې هغه مهال هم ورنه ځېنې محصلان نیول شويوو.
