تخار ولایتینینگ نمکآب دینگیزچهسی 6 آی آلدین، 56 میلیون افغانی خرجت کوتریب قوریلگن و حاضر کیفیتی قویی بولگنی سبب، بوتونلهی بوزیلگن.
مذکور دینگیزچه سوویدن فایدهلنهدیگن تالقان شهری ایکینچیلری و نمکآب تومنی یشاوچیلریدن بیرقطاری نینگ ایتیشیچه، اوشبو دینگیزچه نی سووی «توز کانیدن» اوتگنی باعث، ایکینزارلریگه زیان ییتکیزگن.
تخار ولایتی دینگیز حوزهسینی اداره قیلووچی ریاست باشلیغی انجنیر سالم اکبرینینگ ایتیشیچه، اوشبو پروژهنی خرجتی آسیا ترقیات بانکی تامانیدن توللنگن و قوریلیش ایشینی مسؤولی سمندر شرکتی ایکن. اونینگ ایتیشیچه، مذکور شرکت حاضرگهقدر بو پروژهنی تاپشیرمهگن.
اکبرنینگ کوپهیتیریشیچه، اوشبو پروژهنی ریجهسی و عملگه آشیریلیشی بیرینچی مرته مملکتده سیناو شکلده عمل گه آشیریلهدی. اکبرگه کوره، توز کانینینگ ایریم بولیمی سیلجیگنی سبب، دینگیزچه بوزیلگن.
اونینگ کوپهیتیریشیچه، قوریلیشی گه مسؤول شرکت بیلن باغلنگن قرارداد اساسیده، بو پروژه قوریلیشیده تاش و توپراق دن فایدهلنیشی کیرهک ایدی؛ بیراق محل یشاوچیلرینینگ ایتیشیچه، بو دینگیزچه قوریلیشیده تاش و جغلدن فایدهلنگن و شو یوزهدن سوو چوکیشی آلدی آلینیشی توغریسیده ایجابی نتیجه بیرمهگن.
محل یشاوچیلری حکومتنی آگاهلنتیریشیچه، نمکآب دینگیزچهسی تیزلیکده قیته قوریلمهگن صورتده، اولر تاقچهخانه کانی قازیب چیقاریلیشیگه توسیق بولهدیلر.
نمکآب دینگیزچهسی توز کانیگه سوو چوکیشی و توشیشی آلدی آلینیشی اوچون قوریلگن؛ بیراق اوتگن بیر آیده بوتونلهی بوزیلگن.
تخار ولایتینینگ محلی حکومتی، اوشبو پروژه تیکشیریلیشی اوچون بیر هیأت تعیین قیلگن؛ بیراق تخار سووینی اداره قیلووچی ریاستنینگ ایتیشیچه، مذکور دینگیزچهنی ایریم بولیملری تیزلیکده قیته قوریلیشی توغریسیده قرار قیلینگن.
