جمهور رئیس غنی اوتگن هفته بیر فرمان آرقهلی سیلاولر کمیسیونلرینینگ اعضا و رئیسلرینی چیکلنتیردی. اوشبو کمیسیونلرنینگ رهبرلیک اعضالری چیکلنتیریلگنیدن سونگ، باش قارهلاوچیلیک تامایندن ممنوعالخروج ایتیلدیلر.
سیلاولر ایرکین کمیسیونینینگ اعضا و رئیسلری چیکلنتیریلگنیدن سونگ، نمایندهلر کینگشی سیلاوینینگ نتیجهسینی بیکار قیلینیشی خصوصیده کوپینچه خواطرلر اورتهگه چیقگن ایدی.
عینحالده، حقوقی ایش بیلرمانلرنینگ ایتیشیچه، موفق بولگن نامزدلرگه بیریلگن تصدیق نامهلر، کمیسیونلرنینگ رهبرلیک اعضاسینی عیبلری اثبات ایتیلیشدن آلدین صورت تاپکن صورتده، سیلاو نتیجهسی اوزگرمهیدی.
حقوقی ایش بیلرمانلردن بیری عبدالواحید فرزهیینینگ سلاموطندارگه ایتیشیچه، قانونگه کوره، سیلاونی لغو قیلیش و یا-ده سیلاو آوازلرینی بیکار اعلان قیلیش سیلاولر کمیسیونلرینینگ صلاحیتیدن دیر و بو توغریده باشقه هیچبیر نهاد قرار قیلهآلمهیدی.
اونینگ کوپهیتیریشیچه، نامزدلرنینگ آوازلرینی رشوه اساسیگه کوپهیگنی اثبات ایتیلگن صورتده، آوازلرنی بیکار قیلیش اوچون محکمهنینگ حکم صادر قیلیشگه صلاحیتی بار.
شوتوغریده…
- اعتراضچی نامزدلر: نمایندهلر کینگشی سیلاوینینگ قیتهدن یولگه قوییلیشی کیرهک
غنی: سیلاو دایمی تینچلیک اوچون اونملی دیر
حکومت سیلاوی کمپاین اوچون دولتی امکانیتلردن فایده لنهدی
جناب فرزهیینینگ ایتیشیچه، نمایندهلر کینگشی سیلاویده ساختهکارلیک، و سیلاو جرایملری صورت تاپگن و اونینگ تیکشیریشی زور دیر.
عینحالده، افغانستان ایرکین سیلاوینی کوزه تووچی یا-ده فیفا نینگ اجراییه باشلیغی یوسف رشید نینگ ایتیشیچه، حاضرگهقدر سیلاو نتیجهسی اوستیگه تاثیر قویهدیگن بیر موضوع اثبات ایتیلمهگن.
اونینگ ایتیشیچه، نامزدلرنینگ ساختهکارلیگی خصوصیده محکمه حکم بیرگن حالده، بیر محل یا-ده بیر نامزد آوازینینگ نتیجهسی اوزگرهدی.
بو توغریده باش قارهلاوچیلیک ادارهسینینگ فکرینی آلیش اوچون سعی و حرکت قیلدیک؛ بیراق موفق بولمهدیک. اوتگن کونی باش قارهلاوچیلیک ادارهسی، سیلاولر کمیسیونلرینینگ اعضالریگه قرشی بولگن اتهاملرنی تیکشیریش اوچون کمیته قوریلگنیدن خبر بیرگن ایدی.
