بوگون (شنبه) پارلماننینگ عمومی ییغینیده مجلسنینگ بیر قنچه اعضالری مملکتده نابرقرارلیک میزانی آشیشی اینیقسه عمومی ترانسپورت یوللرده آدم اوغیرلش واقعهسی آشگنلیگیدن خواطر بیلدیرگنلر. مذکور نمایندهلر ملی بیرلیک حکومتینینگ رهبرلریدن امنیت تامین ایتلیشی اوچون بیرگن وعدهسینی ایسدن چیقارمی اهالی جانی توغریسیده تفاوتسیز قالمسلیکلری اوستیده ارغولهگنلر.
مجلسنینگ اعضالریدن لالی حمیدزی و عبیدالله بارکزیلر، مملکتنینگ بیر بولیمیده امنیت تامین ایتیلگن حالده، باشقه بیر بولیمیده ایسه نابرقرارلیک کوتیلمهگن درجه ده آشه دی دیگنلر. اولر، بو وضعیت اهالی حوصلهسینی جدی بیر شکلده پیر قیلگن دیدیلر.
جناب بارکزیگه کوره، 17 آیدن بیری ارزگان ولایتینینگ 4 تومنی دولتگه قرشی قوراللنگن گروهلر قملیده قالماده، اما حکومت قولینی مینگلیگه توتیب فقط تماشا قیلهدی و مذکور تومنلر جنگریلردن تازهلهنیشی اوچون حکومتنینگ هیچ قندهی بیر برنامهسی هم یوق.
تورخم بندریده یوز بیرگن قوراللی توقنشوو خصوصیده اشاره قیلگن نمایندهلر مجلسینینگ اعضالری، مملکتنینگ بیرینچی احتیاجی برطرف ایتیلیشی اوچون باشقه بیر یول اویلیش لازم دیگنلر. بوندن بویان پاکستان تورخم یولینی افغانستانلیکلر یوزیگه یاپیب قوییشی امکاندن هم اوزاق ایمس دیگن پارلمان اعضالری.
مجلس سونگیده پارلماننینگ باشلیغی عبدالرووف ابراهیمی، حکومتدن مملکت بویلب امنیتنی تامین قیلیش قیلهجک بیرینچی ایشلریدن بولیشینی سورهگن. او، حکومت بو توغریده سیاسی، امنیتی شخصیتلر همده افغانستان ملی مجلسینینگ اعضالریذن مصلحت آلیشی بارهسیده تاکید ایتگن.
