.jpg)
د افغانستان کرېکټ ملي لوبډلې بېټسمین نجیب الله ځدراڼ د کاناډا ګلوبل ۲۰ اوریزه کرېکټ سیالیو ته له غوره کېدو وروسته لومړۍ خبرې له سلاموطندار سره وکړې.
نجیبالله ځدراڼ وايي: «ان د «ډرافټ» معلومات هم راته نه وو خو کله چی د بنګله دېش خلاف د بېګا شپې بریا وروسته هوټل ته راستون شوم نو افتاب عالم زیری راکړ چې د کاناډا شل اوریزه لوبو ته اخیستل شوی یم».
ځدراڼ وویل: « افتاب ته مې ور غبرګه کړه چې ګپ لګوې ځواب یې راکړ جدي یم او خبر یې راته وښوده».
نجیب ځدراڼ وايي، ډېر خوشاله دی چې د یوازېني افغان لوبغاړي په توګه د نړۍ د مشهورو لوبغاړو له ډلې دغو سیالیو ته غوره شوی دی او په مونټریال پړانګانو لوبډله کې به ولوبیږي.
.jpg)
نوموړي وویل، تېرکال د بنګله دېش په لیګ کې ښه ولوبېد خو د نړۍ نورو مشهورو کرېکټ لیګونو ته د لار پیداکولو لهپاره د کاناډا لیګ ورته ډير مهم دی او په ځانګړو تیاریو سره به په کې ګډون کوي.
د ټام موډي په روزنه کې د نجیبالله ځدراڼ ترڅنګ په مونټریال پړانګان لوبډله کې ملینګا، سونیل ناراین، تیسارا پریرا ، دنیش رامدین، محمد حفیظ، سکندر رضا او نیپالی سندریپ لمیچاني په څېر مشهور لوبغاړي شتون لري.
د کاناډا په ګلوبل شل اوریزه کرېکټ لیګ سیالیو کې به ۶ لوبډلې ګډون وکړي چې ۵ لوبډلې یې بشپړې شوې دي او د ویسټ انډيز کرېکټ بورډ ځانګړې لوبډله به راتلونکې کې بشپړه او اعلان شي.
د هندوستان په کوربتوب د سترو سوداګریزو (اي پي ایل) سیالیو له کامیابېدو
وروسته د نړۍ زیاترو هېوادونو د شل اوریزه لوبو لیګونه ته مخه کړې چې موخه یې کرېکټ ته د ودی ورکولو ترڅنګ پیسې پیدا کول دي.
افغان کرېکټ بورډ هم سږکال د لومړي پړاو افغانستان پریمیرلیګ شل اوریزه کرېکټ سیالیو د ترسره کېدو خبر ورکړی چې د روان کال اکتوبر میاشتې په ۵مه نېټه به په عربي اماراتو کې ترسره شي.
د کاناډا په ګلوبل شل اوریزه کرېکټ سیالیو کې به د محمد اکرم په روزنه کې ایډمنټون رویلز لوبډلې په ګټه د شاهد افریدي، کریس لین، سهیل تنویر، محمد عرفان، وین پارنیل او لوک رونکي په څېر لوبغاړي شتون ولري.
دغه راز د پیل سیمینز په روزنه کې به په ټورنټو نیشنلز لوبډله کې د ډیرن سمي، سټیف سمت، کیرون پولارډ، کامران اکمل، کیسریک ویلیمز، رومان ریس، جیسن چارلیس او نزاکت خان په څېر لوبغاړي موجود وي.
.jpg)
د ډونون میلر په روزنه کې بیا په وانکوور نایټس لوبډله کې به د کریس ګیل، انډري رسل، ایون لیویس، ټیم سوتي، فواد احمد، بابرحیات او چندریک والټن په څېر او د وقار یونس په روزنه کې په وینیپیګ هاکز لوبډله کې به د ډیون براوو، ډیویډ میلر، ډیویډ وارنر، لینډل سیمیز، ریاض ایمریت، فیډل ایډورډ، ډیرن براوو، جنید صدیقي او رضوان چیمه په څېر د کرېکټ نړۍ مشهور لوبغاړي ولوبیږي.
د کاناډا د نړیوال شل اوریزه لیګ په دغه سیالیو کې بیا د بشپړ غړیتوب لرونکو هېوادونو انګلستان ، ایرلینډ او هندوستان کرېکټ ملي لوبډلو هېڅ کوم لوبغاړی شتون نه لري.
د کانادا په Global T20 کرېکټ سیالیو کې به ګډون کوونکې ۶ لوبډلې د روانې جون میاشتې له ۲۸مې نېټې د جولای میاشتې تر ۱۵مې نېټې ګډون کوونکې لوبډلې یو بل سره د ټورنټو په یوازيني میپل لیف کرېکټ لوبغالي کې سیالۍ وکړي او له ګډون کوونکیو ۶ لوبډلو څخه به ۲ مخکښې لوبډلې فاینل لوبه ترسره کړي.
په یاد سیالیو کې د ځای خپلولو لهپاره د کاناډا د کورنیو ۶۰۰ لوبغاړو په شمول د نړۍ ۱۶۰۰ مسلکي کرېکټ لوبغاړو نوملیکنه کړې وه چې ترې د افغان نجیب الله ځدراڼ په شمول په ۵ لوبډلو کې ۹ لوبغاړي غوره شول.
