افغانستان جمهور رییسی محمد اشرفغنی ینگی ییلنینگ بیرینچی کونی کابینه نینگ قالگن 16 نامزد وزیرینی ایشانچ رایی آلیش اوچون مملکت ملی مجلسیگه تنیشتیردی.
بیرینچی باسقیچده نامزد وزیر تنیشتیریلگن 24 کیشیدن افغانستان ملی خوفسیزلیک باشقرمهسینینگ رییسی شامل 8 کیشی ملی مجلس اعضالرینینگ ایجابی رایینی آلیشگه موفق بولگن ایدی.
بولرنینگ ایچیده نامزد وزیرلردن ایکّی تهسی ملی مجلسگه کیلمسدن آلدین استعفا بیرگن ایدی. مذکور ایکّی کیشیدن بیری خلق ارا پولیس قاره رویخطیده بولگنی اوچون نامزدلیکدن واز کیچگن ایدی.
جمهور رییسلیک سراییدن نشر ایتیلگن خبرنامه ده، کابینهنینگ قالگن نامزد وزیرلرینی تَنیشتیریش اوچون قابلیت همده تخصص نظرده توتیلگنلیگی یازیلگن.
تجارت وزیرلیگی اوچون نامزد همایون رسا، اطلاعات فرهنگ وزیرلیگی اوچون نامزد عبدالباری جهانی، ایکینچیلیک و سوولنتیریش وزیرلیگی نامزدی اسدالله ضمیر، چیگره و قوملر وزیرلیگیگه نامزد محمد گلال منگل، فواید عامه لوازمی اوچون محمود بلیغ، اقتصاد وزیرلیگی اوچون عبدالستار مراد، ترانسپورت و هوا یوللر وزیرلیگی اوچون محمدالله بتاش، معارف وزیرلیگی اوچون اسدالله حنیف بلخی، شهرلر قوریش بوییچه وزیرلیک نامزدی سیدسعادت منصور نادری، عدلیه وزیرلیگی نامزدی عبدالبصیر انور، مخابرات وزیرلیگیگه نامزد عبدالرزاق وحیدی، عالی تحصیلات وزیرلیگی نامزدی فریده مومند، ایش واجتماعی ایشلر بوییچه وزیرلیک لوازمی اوچون نسرین اوریاخیل، مخدر مادهلرگه قرشی کورهش وزیرلیگی اوچون سلامت عظمی، عیاللر وزیرلیگی اوچون دلبر نظری و سوو برق وزیرلیگی اوچون علی احمدعثمانیلردن عبارت 16 کیشی ملی بیرلیک حکومتی تامانیدن ملی مجلسگه تَنیشتیریلگن اوشبو رویخطده افغانستان ملی مدافعه وزیرلیگی اوچون نامزد شخصنینگ اسمی کیرتیلمه گن.
حکومت نینگ مذکور نامزد وزیرلری ملی مجلس اعضالری تامانیدن تصدیق لهنیشی اوچون پارلمانگه تَنیشتیریلهدیلر.
