افغانستان و ناتو تشکیلاتی نینگ امنیتی ییریک رسمی‌لری، امنیتی کوچلرنینگ عملیاتی ده تینچ اهالی قربانلری تیکشیریلیشی اوچون پکتیا باریشگن.
پکتیا ولایتی نینگ مطبوعات دفتری خبرنامه‌سیده یازیلیشیچه، پنجشنبه کون، 24- اسد، ملی مدافعه وزیرلیگی نینگ سرپرستی اسدالله خالد، ایچکی ایشلر وزیرلیگی نینگ سرپرستی مسعود اندرابی، ملی خوفسیزلیک عمومی ریاستی باشلیغی معصوم استانکزی و افغانستانده کیسکین حمایه‌وی کوچلر قومندانی جنرال اسکات میلر، مذکور ولایت گه سفر قیلیشگن.
خبرنامه‌ده کیلیشیچه، امنیتی ییریک رسمی‌لر پکتیا ولایتی نینگ محلی رسمی‌لری بیلن اوچره‌شگنده، مذکور ولایت نینگ زرمت تومنیده امنیتی کوچلرنینگ سونگی عملیاتی نتیجه‌سیده تینچ اهالی قربانلری تیکشیریلیشی اوستیگه تأکیدله‌گن.
شونینگدیک، بو اوچره‌شووده زرمت تومنیده تینچ اهالی قربانلری تیکشیریلیشی اوچون صلاحیت‌لی بیر هیأت ایجاد ایتیلیب و معلومات‌لرینی امنیتی رسمی‌لر بیلن شریک قیلیش‌لری توغریسیده قرار قیلینگن.
ایتیش کیره‌ک کیم، اوتگن دوشنبه کون، 21- اسد، ملی خوفسیزلیک عمومی ریاستی میدیالرگه بیر خبرنامه یوباریب ایتیشیچه، پکتیانینگ زرمت تومنی «گولال‌کو» قیشلاغیده مذکور ریاست کوچلری تامانیدن اویوشتیریلگن عملیات ده 11 جنگری طالب هلاک ایتیلگن، بیراق واقعه‌دن بیر کون اوتگنیدن سونگ، محل یشاوچیلری هلاک ایتیلگن‌لر تینچ اهالی بولگنینی ایتگن.
عین حالده، افغانستان بوییچه بیرلشگن ملت‌لر تشکیلاتی نینگ خاص نماینده‌سی تادامیچی یاماموتو بیلن اوچره‌شگن مملکت ملی خوفسیزلیک مصلحتچیسی حمدالله محب نینگ ایتیشیچه، حکومت تینچ اهالی قربانلری نینگ آلدینی آلیش اوچون جدی دیر و بو توغریده هیچ بیر خطانی کیچیرمه‌یدی.
جناب محب نینگ ایتیشیچه، پکتیاده یوز بیرگن سونگی واقعه جدی شکلده تیکشیریلیب و معلوماتی اهالی بیلن شریک قیلینه‌دی.
