افغانستان سیلاو ایرکین کمیسیونی نینگ کمیشنرلریدن بیری مولانامحمد عبدالله، بوگون سیلاو کمیسیونی گه یوبارگن نامه‌ده ایتیشیچه، جمهورلیک ریاست سیلاوی‌نینگ دستلبکی نتیجه‌سیده قانونی کم‌چیلیک‌لر و بوشلیک‌لر موجود.
اونگه کوره، بو کم‌چیلیک‌لر و بوزمه‌چیلیک‌لرگه یوزلرچه ناقانونی ورق، آواز بیریش زمانیدن تشقری بولگن آوازلر، قیته سنه‌لیشی کیره‌ک بولگن آوازلر و یوقالگن صندوقلرنینگ ورقلری شامل بوله‌دی.
جناب مولانا عبدالله نینگ اوز فیسبوک صحیفه‌سیده یازیشیچه، «119- رقم‌لی قرارنامه 104-، 105-، 109-، 114-، 115-، 116- و 117- رقم‌لی قرارنامه‌لر اساسیده تیارلنگن؛ مین سیلاو ایرکین کمیسیونی نینگ کمیشنری صفتیده، یوقاریده ذکر ایتیلگن قرارنامه‌لرده کیریتیلگن ناقانونی موضوعلر خصوصیده بولگن قرشی توشونچه‌لریم نی دلیل‌لر اساسیده، تحریم قیلدیم.»
اونینگ کوپه‌یتیریشیچه: «سیله‌ش و سیله‌نیش یشاوچیلرنینگ اساسی حقی دیر و سیلاو اداره‌لری بو جریاننی قولی‌لشتیره‌دی و سیلاو اداره‌لری نینگ بوتون عمل‌لری قانون، لایحه و طرزالعمل‌لر اساسیده، عمل‌گه آشیریلیشی کیره‌ک.»
سیلاو ایرکین کمیسیونی نینگ اوشبو کمیشنرینی یازیشیچه: «دستلبکی و سونگی نتیجه تشقی و ایچکی باسیم‌لر اساسیده ایمس، بلکیم حقوقی و تخنیکی نقطه‌ی نظردن کمیسیونلرنینگ ایرکین‌لیگی، طرفسیزلیگی، شفافلیگی و امانتدارلیگی اساسیده بولیشی لازم.»
مولانا عبدالله نینگ ایتیشیچه، سیلاو شکایت‌لرینی تینگلش کمیسیونی سیلاو توزومی نینگ محکمه‌سی اورنیده توخته‌گن و او، بو کمیسیوندن طرفسیزلیگی‌نی سقلب قانون، لایحه و طرزالعمل اساسیده، یراقلی آوازلرنی یراقسیز آوازلردن اجره‌تیشی‌نی سوره‌گن.
جمهورلیک ریاست سیلاوی نینگ دستلبکی نتیجه‌سی اوتگن کون یکشنبه سیلاو ایرکین کمیسیونی تامانیدن اعلان قیلیندی. بو نتیجه اساسیده، محمداشرف غنی 50.64% و عبدالله عبدالله 39.52% آواز قولگه کیریتیشگن. عبدالله عبدالله و باشقه نیچه نامزد بو نتیجه‌نی قبول قیلیشمه‌گن.
