افغانستان سوداگرلیک و ترانزیتی بندرلری‌نینگ مسؤولیتی صنعت و سوداگرلیک وزیرلیگی‌دن مالیه وزیرلیگی‌گه انتقال بیریله‌دی.
مالیه وزیرلیگی سوزلاوچیسی اجمل‌حمید عبدالرحیم‌زی‌نینگ سلام‌وطندارگه ایتیشیچه، بندرلرنینگ مسؤولیتی‌نی صنعت و سوداگرلیک وزیرلیگی‌دن مالیه وزیرلیگی‌گه انتقال بیریش ایشی نهایی بولگن و تیزلیک‌ده مملکت‌نینگ برچه بندرلرینی مسؤولیتی مالیه وزیرلیگی‌گه تاپشیریله‌دی.
جناب عبدالرحیم‌زی، مملکت بندرلری‌نینگ مسؤولیتی‌نی مالیه وزیرلیگی‌گه انتقال بیریش‌دن مقصد، خصوصی بولیم‌گه کوپراق خذمت قیلیش و باشقه مملکت‌لر بیلن سوداگرلیک علاقه‌لرنی کینگه‌یتیریش دییدی.
ایتیلیشیچه، بندرلرنینگ مسؤولیتی صنعت و سوداگرلیک وزیرلیگی‌دن مالیه وزیرلیگی‌گه تاپشیریلگنده، بندرلری‌نینگ حاضرگی ایشلاوچی‌لری، وظیفه‌لریگه دوام بیره‌دیلر.
افغانستان‌نینگ ایران بیلن بولگن سوداگرلیک علاقه‌سی اسلام قلعه و زرنج بندرلری آرقه‌لی، اوزبیکستان بیلن حیرتان بندری آرقه‌لی، تاجیکستان بیلن شیرخان بندری آرقه‌لی، ترکمنستان بیلن آقینه و تورغندی بندرلری آرقه‌لی و پاکستان بیلن تورخم و سپین‌بولدک بندرلری آرقه‌لی باغلنه‌دی.
