ثقافت اسلامی مضمونی دینی «رادیکالیسم» رواجلنیشی گه سبب بوله‌دی.
افغانستان بوییچه استراتیژیکی مطالعه‌لر انستیتوتی نینگ ینگی‌لیک‌ده اوتکزگن تدقیقاتی‌دن قولگه کیریتیلگن معلومات گه کوره، مملکت بیلیم یورت‌لریده درس بیریله‌دیگن ثقافت اسلامی مضمونی مملکت اوقووچی‌لری آره‌سیده دینی رادیکالیسم یا-ده افراطیت‌چیلیک رواجلنیشی گه سبب بوله‌دی.
بوگون «پنج‌شنبه» کابل‌ده خبری بیر ییغینده نطق سوزله‌گن افغانستان بوییچه استراتیژیکی مطالعه‌لر انستیتوتی نینگ تدقیقاتچیسی رامین کمانگرگه کوره، اوشبو تدقیقات سوراقلریگه جواب بیرگن اوقووچی‌لردن 31% ثقافت اسلامی اوقیتووچی‌لری هردایم اسلامی خلافت گه اورغولش‌لرینی ایتگن.
اوشبو تدقیقات کابل، هرات و ننگرهار ولایت‌لرده اوتکزیلگن و بو تدقیقات دن قولگه کیریتیلگن معلومات گه کوره، اوقووچی‌لردن 35.5% اسلامی خلافت ایسته‌یدیلر و باشقه 75.3% اسلام کینگه‌یتیریلیشی اوستیگه تأکید قیلگن‌لر.
جناب کمانگرگه کوره، سوراقلرگه جواب بیرگن‌لردن 34.4% جمهورلیک توزومی، 17.2% اسلامی امارت، 34.9% اسلامی خلافت و 4.6% باشقه توزوملر تشکیل ایتیلیشی‌نی ایسته‌گن‌لر.
بو آره‌ده جمهورلیک توزومی اوچون ایجابی جواب بیرگن‌لردن کوپینچه‌سی کابل بیلیم یورتیده و اینگ آزی هرات بیلیم یورتیده بولگن.
شونینگدیک، اوشبو تدقیقاتده کیلیشیچه، امارت توزومی اوچون ایجابی جواب بیرگن‌لردن کوپینچه‌سی ننگرهار بیلیم یورتیده و اینگ آزی هرات بیلیم یورتیده بولگن، بیراق عکسینچه‌سی خلافت توغریسیده جواب بیرگن‌لردن کوپینچه‌سی هرات بیلیم یورتیده ایکن.
تدقیقاتدن قولگه کیریتیلگن معلومات اساسیده، سوراقلرگه جواب بیرگن‌لردن 39.9% افغانستان سیاسی توزومی اسلامی بولگنی گه ایشانه‌دی و عین حالده، 45.9% بو توزومنی بیر آز اسلامی دیب بیله‌دیلر و 13.9% افغانستان توزومی‌نی اسلامی ایمس دییدیلر.
بیراق، اوشبو ییغین اشتراکچی‌لریدن بیرقطاری، بو تدقیقات‌نی ناقص و نظریه‌لرینی شخصی دیب بیله‌دیلر.
شونینگدیک، بوندن آلدین مملکت پارلمانی‌ده ثقافت اسلامی کتاب‌لری و ثقافت اوقیتووچی‌لری تامانیدن بیلیم یورت‌لرنینگ اوقووچی‌لری آره‌سیده افراطیت‌چیلیک رواجلنتیریلیش موضوعی بیان ایتیلگن ایدی.
