افغانستان ملی خوفسیزلیک کینگشی سوزلاوچیسی نینگ ایتیشیچه، جاری ییل فبروری آیی ده زوروانلیک‌لر کمه‌ییش هفته‌سیدن سونگ، طالبان گروهی هرکون مملکت نینگ تورلی منطقه‌لریده اورته شکلده 44 هجوم اویوشتیرگن.
بوگون «سه‌شنبه، 10- سرطان» ملی خوفسیزلیک کینگشی سوزلاوچیسی جاوید فیصل نینگ اوز توییتر صحیفه‌سیده یازیشیچه، طالبان نینگ اوشبو هجوملری نتیجه‌سیده هرکون کمیده 24 تینچ اهالی هلاک یا-ده یره‌لنگن.
جناب فیصل نینگ کوپه‌یتیریشیچه، تینچلیک کیلیشوونامه نینگ موفقیتی زوروانلیک‌لر کمه‌ییشی و افغانلر ارا مذاکره باشله‌نیشی گه باغلیق بولگن.
زوروانلیک‌لر کمه‌ییش هفته‌سی اوتگن ییل حوت آیی نینگ بیرینچی کونلریده باشلندی و 10- حوت آمریکا و طالبان آره‌سیده تینچلیک کیلیشوونامه امضالنگونگه‌قدر دوام ایتدی. اوشبو کیلیشوونامه امضالنگنیدن ایکی کون اوتگنیدن سونگ، طالبان گروهی بیر اعلامیه نشر قیلیب افغانستان امنیتی کوچلری گه قرشی هجوملری باشله‌نیشیدن خبر بیردی.
تینچلیک کیلیشوونامه امضالنگنیدن سونگ، افغانستان دولتی نیچه مرته طالبان نی تینچلیک کیلیشوونامه نی نقض قیلیش گه عیب‌لب و بو گروه تینچلیک کیلیشوونامه نی نظرگه آلمه‌ی زوروانلیک‌لرینی کوپه‌یتیرگنینی ایتدی.
طالبان گروهی هم ایریم قضیه‌لرده افغانستان دولتی نی بو کیلیشوونامه نی نقض قیلیش گه عیب‌له‌دی.
طالبان گروهی حاضرگه‌قدر ملی خوفسیزلیک کینگشی نینگ گزارشی توغریسیده هیچ نرسه دیمه‌گن.
افغانستان امنیتی کوچلری و تینچ اهالی برابریده طالبان گروهی نینگ هجوملری شدتلنگن بیرچاغده ترقه‌تیلگن گزارشلر اساسیده، افغانلر ارا تینچلیک مذاکره جاری میلادی ییل، جولای آیی نینگ جریانیده قطر باشکینتی دوحه ده یولگه قوییلیشی خصوصیده، قرار قیلینگن.
