راپورونه وايي، چې د تېرو څو ورځو راهیسې په دغه هېواد کې د زلزلو له امله د وژل شويو شمېر ۵۰۰۰ تنو ته ورسېد او اوس هم خلک غواړي، چې د زلزلې له ويرې ځانونه خوندي ځايونو ته ورسوي.
په دغو وژل شويو کې شاوخوا ۴۳۰۰ تنه يواځې د نيپال په مرکز کهټمنډو کې د خاورو لاندې شوي دي.
همدارنګه د يادې پېښې په اړه تازه راپورونه وايي، چې ټولټال په نيپال کې ۷۰۰۰ تنه ټپيان شوي دي.
له بل لوري بیا ملګري ملتونه اټکل کوي، د ریښتر په کچه د ۷،۹ درجې زلزلې له کبله د دغه هېواد په ۳۹ ولایتونو کې نژدې ۸ میلیون وګړي زیانمن شوي.
نيپالي چارواکي د قربانیانو په یاد په خپل هېواد درې ورځې ملي ویر هم اعلان کړ.
د ياد هېواد صدر اعظم سوشیل کویرالا ویلي، حکومت د همکاریو له پاره تر خپلې وسې هڅه کړې ده، خو په وينا يې د دغه ناورین له امله د زيانمنو کره شمېره نه شي ويلی.
نوموړي زياته کړې، د ژغورنې ډلې او مرستندویان د نړۍ له ګوټ ګوټ نه د دوی مرستې ته دانګلي، خو په وينا يې د نيپال غرنیو سیمو ته په کتلو سره، د ژغورنې او همکارۍ ډلې له ستونزو سره مخامخ شوي دي، چې ان په ځينو سيمو کې خواړه هم نه شي ور رسولی.
د ويلو ده، چې دغې خونړۍ زلزلې د نيپال تاريخي منارونو، ودانیو او نورو، میشت ځایونو ته هم سخت زيانونه اړولي دي.
