د طالبانو ډلې یوې خبرپاڼې الاماره نن د خپل یو مشر مولوي جلالالدین حقاني د مړینې خبر ورکړیدی.
خبرپاڼه لیکي، مولوي جلالالدین حقاني د ورپېښې ناروغۍ له امله مړ شوی.
مولوي حقاني – چې په خټه ځدراڼ او د پکتیا ولایت اوسېدونکی و ـ د روسانو د راتګ پر ضد جګړه کې د مولوي محمد یونس خالص په مشرۍ د اسلامي حزب نوموتی قوماندان و.
د ډاکتر نجیبالله د واکمني له ړنګېدو وروسته یې د مجاهدینو په حکومت کې د عدلیې وزیر په توګه دنده مخته وړله.
هغه مهال یې هڅه وکړه چې د اسلامي حزب او جمعت ترمنځ روغه جوړه وکړي؛ خو بریالی نهشو.
د طالبانو له راپورته کېدو سره سم مولوي جلالالدین حقاني له هغوی سره یوځای او د سرحدونو، قومونو او قبایلو چارو وزارت وزیر شو.
د طالبانو ادارې له ماتې وروسته جلالالدین حقاني، د حقاني شبکه جوړه کړه.
پر حقاني شبکې په کابل او ځېنو نورو ولایتونو کې د خونړیو ځانمرګو بریدونو تورونه لګېدلي دي.
