مشرانو جرګې نن د ولسمشر هغه فرمان تاید کړ، چې له مخې به یې د هرو سلو افغانیو کریډیټ کارټ نه، ۱۰ سلنه مالیه د دولت بودیجې ته ځي.
د مشرانو جرګې له خوا دا فرمان په داسې حال کې تایدېږي، چې له دې وړاندې په ولسي جرګه کې له بحث وروسته رد شوی وی و.
د مشرانو جرګې د مخابراتي او مواصلاتي کمېسیون مشر وویل، د ولسمشر غني له خوا صادر شوی فرمان یې تاید کړ، خو هڅه یې کړې، چې د مخابراتي شبکو مکالماتي نرخونه راټیټ شي.
د دې کمېسیون مشر جاوېد روف زیاته کړه، چې د مخابراتو او ټکنالوژۍ وزارت ته یې په همدې فرمان کې یوه ماده د رایو په اکثریت سره وراضافه کړې ده.
په ماده کې راغلي دي: وروسته له دې به هره مخابراتي شبکه د یوې دقیقې پر سر یوه افغانۍ لګښت اخلي.
د روف پر وینا، د دوی او د یو بهرني پلاوي له پلټونو او څېړونو وروسته دې نتیجې ته رسېدلي دي، چې که هره مخابراتي شبکې د یوې دقیقې پر سر یوه افغانۍ لګښت پرې کړي؛ بیا هم ګټه کولی شي.
د ویلو ده، چې یوې شمېرنې له مخې د يوې اونۍ په ترڅ کې د همدې ټليفوني شبکو په وسيله د دولت خزاني ته ۸۷ ميليونه افغانۍ رسېدلي وې.
دا پر داسې مهال ده، چې ډېر هېوادوال هم د ولمسشر له دې فرمانه ملاتړ کوي، چې د ټليفوني شبکو پر کريډيټ کارټونو دې لس سلنه ماليه وضع شي، خو وايي چې دا پروسه باید شفافه وي او له ټلیفون کاروونکو نه اخیستونکي مالیه باید د خلکو په ګټه مصرف شي.
دوی همداراز په دې ټینګار کوي، چې په دې پیسو سره باید د دولت په عوايدو کي ډېروالی راشي او په دې توګه به دولت خلکو ته اساسي خدمتونه وړاندي کړي.
