کابل شهردارلیگی دکاندارلرگه بیر مکتوب یوللب و اولردن 28- اسد، افغانستان مستقل‌لیگی نینگ 100 ییل‌لیگی‌دن نشانلش اوچون مملکت نینگ اوچ رنگ بیره‌قینی دکانلری نینگ اوستیگه قیستریشی‌نی سوره‌گن.
بوگون «چهارشنبه» کابل شهردارلیگی آدرسیدن اجتماعی ترماقلرده قولمه قول بولگن مکتوبده برچه دکاندارلرگه بویروغ بیریلگن و اونگه اساس، 28- اسد، افغانستان مستقل‌لیگی نینگ 100 ییل‌لیگی دن نشانلش اوچون مملکت بیره‌قی نی مغازه‌لرینی اوستیگه قیستیریب و مغازه‌لرینی اونگیده بولگن گلدانلرینی بویب و یوویشلری طلب قیلینگن.
اوشبو مکتوبده کیلیشیچه، بو بویروغدن باش تارتیلگن صورتده، دکاندارلر بیلن قانون اساسیده یانده‌شیلیب، جریمه یا-ده دکانلری باغلنه‌دی.
بیراق، کابل شهری دکاندارلریدن بیرقطاری نینگ ایتیشیچه، بیره‌ق قیستیریش اوچون دکاندارلرنی مجبورلش قانون گه قرشی دیر. اولرگه کوره، ملی کونلرده دکان اوستیگه بیر یا-ده نیچه بیره‌ق قیستیریش یخشی ایش دیر، بیراق بو ایش کابل شهردارلیگی تامانیدن جبری قیلینیشی قانون گه قرشی کیله‌دی.
اوشبو دکاندارلرنینگ کوپه‌یتیریشیچه، افغانستان یشاوچیلری نینگ اقتصادی وضعیتی یخشی ایمس دیر و تورلی بهانه‌لر بیلن اهالی اوستیگه کیره‌کسیز خرجت تحمیل قیلینمه‌سی کیره‌ک.
بیراق، کابل شهردارلیگی سوزلاوچیسی نرگس مومندنینگ ایتیشیچه، اولر مملکت مستقل‌لیگی نینگ یوز ییل‌لیگی تکرارسیز شکلده نشانله‌نیشی خصوصیده قرار قیلگن.
اونگه کوره، شهردارلیک نینگ بودجه‌سی کوپ بولمه‌گنی باعث، شهرنی هر بیر ییریده بیرق قیستیره آلمه‌یدی، شو یوزه‌دن یشاوچیلر یاردم بیریشی کیره‌ک.
اوتگن ییل‌لرگه قرشی، بو ییل حکومت مملکت مستقل‌لیگی نینگ یوز ییل‌لیگی دن نشانلش اوچون تورلی برنامه‌لر و کوپ بودجه نظرگه آلگن.
میدیالر تامانیدن نشر ایتیلگن حجت گه کوره، جمهور رئیس غنی، دولت بودجه‌سیدن کمیده 400 میلیون افغانی نی مملکت مستقل‌لیگی نینگ یوز ییل‌لیگی‌دن نشانلش بیره‌می اوچون اختصاص بیرگن.
