مملکت مدافعه وزیرلیگی، امنیتی‌کوچلر قربان بولگن‌لری باره‌سیده، تشقی میدیالردن بیری‌نینگ گزارشینی رد قیلدی. 24- اسد شنبه کونگی تشقی میدیالردن بیری تامانیدن نشر ایتیلگن گزارش‌گه کوره، اوتکن اوچ ییل مابینی‌ده، افغانستان امنیتی کوچلریدن 13 مینگ کیشی هلاک بولگن ایکن.
اقش «ای. بی. سی» تلویزیونینگ گزارشی‌گه کوره، امنیتی کوچلرنینگ بو رقمی طالب‌لر و باشقه تروریستی گروه‌لر قولیدن ایری اوروش‌لرده هلاک بولگنلر. شونینگ‌دیک، گزارش‌گه کورسه‌تیلیشیچه، اوشبو قربان بوله‌دیگنلر سانی کیله‌سی آی‌لرده کوپه‌ییشی ممکن.
بو گزارش‌ده کیلیشیچه، جاری ییل قربانلیگی اوتکن ییل‌گه قره‌گنده، 40 فایز کوپیگن.
مدافعه وزیرلیگی سوزلاوچیسی اورین باسری دولت وزیری‌نینگ شنبه کون بیر خبری ییغینده، ترقه‌تیلگن گزارش‌ده‌گی افغان حربی‌لری قربان بولگنلر سانی انیق ایمس دیگن.
جناب وزیری، افغانستان حربی‌لری اولیمی توغری‌سیده نشر ایتیلگن گزاش‌نی مبالغه دیب بیله‌دی، بیراق، اوشبو قربانلر سانی توغری‌سیده مدافعه وزیرلیگی‌دن معلومات بیرمه‌گن. او، تشقی میدیالر بونده‌ی گزارش ترقه‌تیشلری بیلن افغان حربی‌لری‌نینگ روحیه‌سی کوچسیز ایتیلیشی‌نی ایسته‌یدی دیگن.
اونینگ ایتیشیچه، افغانستان امنیتی کوچلریدن کته قسمی ایریم اوروش‌لرده جان بیرگن، بیراق اوچ ییل جریانیده 13 مینگ حربی اولگن‌لیگی اولر اوچون قبول ایمس.
عین حالده، جناب وزیری، امنیتی کوچلر قربان بولیش اصلی سببی عملیات‌لر رهبرلیگی‌ده کم‌چیلیک بولگنی دییدی.
باشقه تاماندن، امیریکه مدافعه وزیرلیگی (پنتاگون) اوتکن جمعه‌ده بیر گزارش ترقه‌تیشی بیلن جاری ییل جنوری آیی باشله‌نیشیدن جولای آیی سونگی‌گه قدر افغانستان امنیتی کوچلریدن هلاک بولگنلرسانی 4302 کیشی دیب معلوم قیلگن. شونینگ‌دیک ایتیلیشیچه، اوشبو رقم ایریم اوروش‌لر و قورال‌لی گروه‌لر تامانیدن اولدیریلگن.
گزارش‌ده‌گی بیلگی‌گه کیلیشیچه، اوتکن 8 آی جریانیده امنیتی کوچلردن 8009 ته‌سی یره‌لنگن، بو رقم اوتکن ییل‌گه قره‌گنده 36 فایز کوپیگنینی کورسته‌دی.
مذکور سانده کورسه تیلگن قربان بولگنلر حربی کوچلر، پولیس، محلی پولیس و هوایی کوچلر شامل دیر.
شونده‌ی بیرحالده، اوتکن ییل امنیتی کوچلردن 3337 ته‌سی هلاک بولیب و باشقه 5746 ته‌سی یره‌لنگن ایکن.
جاری ییل باشیده مملکت شمالی ولایت‌لریده طالب‌لر هجومی شدت‌لنگنی باعث، امنیتی کوچلر مذکور گروه بیلن ایریم ییرلرده اوروشگن. شونینگ‌دیک اوشبو هجوم‌لر اوتکن 8 آی‌ده قربان بولگنلر رقمی کوپه‌ییشی‌گه سبب بولگن.
مملکت 13 ولایتیده کینگ عملیات‌لر
مدافعه وزیرلیک سوزلاوچیسی اورین باسری‌نینگ ایتیشیچه، ایکی کوندن بویان ایری عملیات‌لر نتیجه‌سیده، 123 طالب هلاک بولگن و باشقه 67 ته‌سی یره‌لنگن.
اونینگ ایتیشیچه، بو توقنه‌شوولرده امنیتی کوچلردن 13 ته‌سی هلاک بولگن.
جناب وزیری‌گه کوره، اوتکن 24ساعت‌ده امنیتی کوچلر مملکت 13 ولایت‌ده 19 عملیات یولگه قویگن.
اونینگ بیلدیریشیچه، بیش عملیات فاریاب، سرپل، کندز، بغلان و تخار ولایت‌لریده اوتکزیلگن.
وزیری‌نینگ کوپه‌یتیریشیچه، 201 سیلاب، 203 تندر، 209 شاهین و 207 ظفر قول اردولری مملکت ایریم منطقه‌لریده عملیات اوتکزگن و نتیجه‌ده طالب‌لر قرارگاه لری‌نی تصرف قیلگنلر.
مدافعه وزیرلیک سوزلاوچیسی اورین باسری‌نینگ ایتیشیچه، حربی هوایی کوچلر اوتگن کوندن بویان 122 اوروش و اکمالاتی اوچیش عمل‌گه آشیرگن.
شونده‌ی بیرحالده، جمهور رییس بیرینچی اورین باسری جنرال عبدالرشید دوستم، نیچه کوندن بویان فاریاب ولایتی ناتینچ تومنلریده یقیندن اوروش میدانیده حضور کیلتیرگن.
وزیری، اوروش میدانیده جناب دوستم حضوری‌نی اهمیتلی بیله‌دی. او، شونینگ‌دیک جمهور رییس بیرینچی اورین باسری‌دن خوست، پکتیا ولایت‌لری و باشقه اوروش میدان‌لریده حضور تاپیب افغانستان حربی‌لری‌گه روحیه بیریشینی سوره‌دی.
