میلادی 2001- ییل، 11- سپتامبرده دنیا سوداگرلیک مرکزی ایکی تامانلمه برج‌لری ییقیلگنیدن سونگ، دنیا دقتی‌نی افغانستان اوزیگه جلب ایدی؛ حامد کرزی قدرت گه ییتیشدی و چیت ایللیک اداره‌لر، میلیاردلرچه دالر بیلن بو مملکت گه یول آلدی و بوندن سونگ، کیچیک و کته سرمایه یاتقیزیش‌لرگه زمینه یره‌تیلدی.
خلق ارا و ایچکی سرمایه یاتقیزووچیلر، تورلی بولیم‌لرده سرمایه یاتقیزدیلر و اوشبو بولیم‌لردن اساسی بیری مخابرات ایدی.
دستلب بو شرکت‌نینگ رقمی بیر یا-ده ایکی ایدی و شونینگ‌دیک، بیر سیمکارت بهاسی 100 امریکا دالریدن اوتردی، بیراق زمان اوتیشی بیلن بو شرکت‌لرنینگ رقمی 6 دن آشدی و افغانستان‌نینگ اوزاق منطقه‌لریگه ییتکیزیلدی.
عین حالده، میلادی 2014- ییل‌دن سونگ، سرمایه یاتقیزیشلر میزانی کمه‌یدی، بیراق حاضرگچه مخابراتی شرکت‌لرنینگ بازاری قیزیق دیر. کونده هر بیر مشتری اوز تلیفونی‌دن نیچه پیام قولگه کیریته‌دی.
هر بیر شرکت مشتری تاپیش اوچون سعی و حرکت قیله‌دی؛ بیرقطاری تورتینچی نسل انترنت (4G) گه ناز قیله‌دی و باشقه بیرقطاری، کیفیت‌لی سیس و قونغیراق بهاسی قوییلیگی‌ده. لیکن اوشبو شرکت‌لردن فایده‌لنگن‌لردن کوپینچه‌سی راضی کورینمه‌یدی.
بوگون‌نی یشاوچیلر مخابراتی شرکت‌لرنینگ خذمت‌لریدن راضی دیر می یا-ده یوق؟ ریجه‌سی بیلن باشله‌دیم.
اوشبو سوراققه جواب بهرام‌نینگ ایتیشیچه، مخابراتی تکلیف‌لرنینگ کوپینچه تبلیغی پیاملرنی اوقیمس‌دن اوچیره‌دی. او بیلن باشکینت ینگی شهریده اوچره‌شدیم. بهرام‌نینگ ایتیشیچه، تکلیف‌لردن جوده هم آز فایده‌لنه‌دی.
اونگه کوره، مخابراتی شرکت‌لرنینگ تبلیغ‌لریدن کوپینچه‌سی حقیقت‌دن اوزاق و الداوچیلیک دیر. بهرام‌نینگ کوپه‌یتیریشیچه، «تبلیغات‌لرده اوشبو شرکت‌لر تامانیدن انترنت خدمت‌لری جوده کیفیت‌لی، انترنت چقان و بهاسی کم دییله‌دی، لیکن فایده‌لنگن صورتده، کیفیت سیزلیگی، یوقاری بها و ایتیلگن نرسه‌لردن هیچ بیر خبر یوقلیگینی سیزه‌سیز.»
کابل‌نینگ اوشبو یشاوچیسی گه کوره، مخابراتی شرکت‌لرنینگ ینگی تکلیف‌لری، یالغیز مشتریلرنینگ چونته‌گیدن پول چیقاره‌دی و حقیقی خذمت‌دن هیچ نرسه قولگه کیلمه‌یدی.
باشکینت یشاوچیلریدن باشقه بیری مینا رضایی‌نینگ ایتیشیچه، کونده مخابراتی شرکت‌لرنینگ تبلیغی پیاملری اونگه ییتیشه‌دی «کیین مه کیین مسیج‌لر و مخابراتی شرکت‌نینگ دواملی قونغیراقلری، می‌نینگ زیریکتیرگن و حتی بو وضعیت‌دن چیقیش اوچون دوست‌لریم‌دن یاردم سوره‌دیم.»
اونینگ ایتیشیچه، مخابراتی شرکت‌لرنینگ ایریم تکلیف‌لری جمله‌دن انترنت و پول بهاسی‌دن فایده‌لنه‌دی. خانم رضایی، مخابراتی شرکت‌لرنینگ خذمت‌لرینی یمان و یخشی‌گه اجره‌ته‌دی. او، قونغیراق بهاسی کم‌لیگی‌دن راضیلیک بیلدیریب و اونی شرکت‌لرنینگ بیلشوولریگه باغلیق بیله‌دی.
حسین بیلن خیرخانه منطقه‌سیده اوچره‌شدیم. اونینگ ایتیشیچه، دستلب تکلیف‌لردن فایده‌لنه‌دی و کیین ایسه، خرجت کوپلیگی‌نی بیلیب و هیچ بیر منفعت یوقلیگینی سیزگن. اونینگ کوپه‌یتیریشیچه، نیچه مرته مخابراتی شرکت‌لر، اتفاقی تکلیف‌لرنی فعال قیلگن.
اوندن شرکت‌لرنینگ خذمت‌لری توغریسیده سوره‌دیم. اونینگ ایتیشیچه، مخابراتی شرکت‌لر هیچ قنده‌ی خذمت قیلمه‌یدی و تلیفون آرقه‌لی اوغیرلش و پول آلیش‌گه زمینه یره‌ته‌دی.
بو مسئله توغریسیده سونگ نتیجه گه ایریشیش اوچون مخابراتی شرکت‌لرنینگ فکرینی اورگه‌نیش اوچون قصد قیلدیم و شو یوزه‌دن افغانستان مخابراتی خذمت‌لرینی کوزه‌تووچی اداره گه باش اوردیم؛ بو اداره مخابراتی مشتریلرنینگ شکایت‌لریگه تینگلش اوچون مسؤول دیر.
افغانستان مخابراتی خذمت‌لرینی کوزه‌تووچی اداره (اترا) مصلحتچیسی سیدمحمد انوری‌نینگ سلام‌وطندارگه ایتیشیچه، مخابراتی شرکت‌لرنینگ مشتریلری قیین‌چیلیک‌لرینی «999 و 998» رقم‌لریگه قونغیراق قیلیب مسؤوللر بیلن شریک قیله آله‌دی و قیین‌چیلیک‌لری رویخط‌گه آلینگنیدن سونگ، اترا اداره‌سی‌نینگ نظارت و کنترول ریاستی تامانیدن تیکشیریله‌دی.
جناب انوری‌نینگ کوپه‌یتیریشیچه، اترا اداره‌سی‌نینگ تیکشیرووچی تیم‌لری مشتریلرنینگ قیین‌چیلیک‌لرینی حل قیلیش اوچون نیاز بولگنده ساحه گه یوباریله‌دی. اترا اداره‌سی مصلحتچیسی‌نینگ ایتیشیچه، قانونگه قرشی ایش قیلگن ترماقلر مذکور اداره تامانیدن جریمه بوله‌دی و مشتریلرنینگ قیین‌چیلیک‌لریگه دقت قیلمه‌گن صورتده، قانون اساسیده فعالیت جوازی لغو ایتیله‌دی.
مخابرات وزیرلیگی تامانیدن بیریلگن رقم اساسیده، حاضر افغانستان‌نی اولتیریش منطقه‌لریدن 86% مخابراتی خذمت‌لردن فایده‌لنه‌دی و جمعیت‌نی 72% دن آرتیغی قول و ثابت تلیفونلردن ایش آله‌دی. شونینگ‌دیک، مملکت‌ده تلیفون سوزلشوو بهاسی هند و پاکستان استثنا منطقه‌نینگ باشقه مملکت‌لریگه نسبَتن ارزان دیر.
