حکومت مسوول‌لری، اعدام‌گه حکم ایتیلگن شخص‌لرنینگ دستلبکی رویخطی افغانستان جمهور رییسی‌گه یوباریلگن لیگی‌نی ایتگن‌لر. بو رویخط جمهور رییس تامانی‌دن تصدیق لنگن‌دن کیین عمل‌گه آشیریله‌دی.
بوندن بیر هفته آلدین کابل‌نینگ محمود‌خان کوپریگی یقینی‌ده جایلشگن اونینچی حوزه‌ده صادر ایتیلگن خودکش هجوم مسوولیتی‌نی حقانی ترور ترماغی اوز ذمه‌سی‌گه آلگن‌دن سونگ، افغانستان اهالی‌سی قول‌گه آلینگن ترورچی گروه‌لر اعضاسی دارگه تارتیلیشی‌نی حکومت‌دن سوره‌دیلر.
شونینگ‌دیک افغانستان‌لیک‌لر حقانی ترور ترماغی‌نینگ بلند مرتبه‌لی رسمیلریدن بولگن انس حقانی دارگه تارتیلیب اوز عملی‌گه تاپشیریلیشی اوچون حکومت‌دن تفاوت‌سیز قالمس‌لیگی‌نی سوره‌گن ایدیلر. بو مساله اجتماعی ترماق‌لر جمله‌دن فیس بوک‌که کینگ عکس ایتیریلدی.
جمهور رییس سوزلاوچی‌سی‌نینگ اورین باسری شاه‌حسین مرتضوی‌نینگ بوگون بیر خبری ییغین‌ده ایتیشیچه، افغانستان جمهور رییسی عدلی وقضایی اداره‌لرگه ترورچیلیک‌که حادثه‌لرده قولی بولگن کیشی‌لر اوستیدن محکمه قراری صادر ایتیلیشی‌نی سوره‌گن.
جناب مرتضوی، دارگه تارتیلیشی حکمی صادر بولگن شخص‌لرنینگ دستلبکی رویخطی بوگون جمهور رییس‌لیک سرایی‌گه جونه تیلگن لیگی‌نی بیلدیرگن. او، بو قرار جمهور رییس تامانی‌دن دستک‌لنگن‌دن کیین اجرا ایتیله‌دی دیگن.
شونینگ‌دیک جناب مرتضوی، هنوزگچه انس حقانی‌نینگ دوسیه‌سی اوز پایانی‌گه ییتمه‌گن دیگن.
شونینگ‌دیک اوتگن کون قطرده‌گی قورال‌لی طالب‌لرنینگ وکالت‌خانه‌سی بیر بیانات ترقه‌تیب، مذکور حرکت‌نینگ یوقاری مرتبه‌لی رسمیلریدن پاکستان‌گه کیتگن‌لیگی‌نی بیلدیرگن ایدی. هیات نینگ سفریدن نیت افغانستان‌لیک قاچقین‌لر مساله‌سی همده چیگره موضوعی اوستی‌ده بحث قیلیش بولگنی ایتیله‌دی.
عین حالده، جناب مرتضوی افغانستان حکومتی قره‌شیدن، قاچقین‌لر و چیگره مساله‌سی اوچون ترورچی گروه‌نینگ مذاکره اوتکزیشی قارلنه‌دی. چونکه ترورچی بیر گروه مهاجرلر مساله‌سی‌نی حل قیلیش اوچون هیچ قنده‌ی صلاحیت‌گه ایگه ایمس.
