محمد اشرف غنی، رئیس‌جمهوری کشور با امام‌علی رحمان، رئیس‌جمهوری تاجیکستان از طریق تلفن صحبت کرده است.
ارگ ریاست جمهوری با نشر خبرنامه‌یی گفته که سران دو کشور در این گفت‌وگوی تلفنی در مورد روابط دو جانبه، به‌ویژه تجارت، ترانزیت، تقویت همکاری‌های منطقه‌یی و افزایش همکاری‌ها در امتداد سواحل دریای آمو، صبحت کرده‌اند.
در این خبرنامه که امروز دوشنبه، سوم سنبله/ شهریور، به نشر رسید به نقل از رئیس‌جمهور غنی آمده است که «سرحد افغانستان و تاجیکستان به نقطۀ دوستی و پیش‌رفت مبدل می‌گردد و نمونۀ دوستی و همکاری خوب میان دو کشور همسایه خواهد بود.»
بر اساس خبرنامۀ ارگ، رئیس‌جمهوری تاجیکستان از پروسۀ صلح به رهبری و مالکیت حکومت افغانستان حمایت کرده و وعده داده است که کشورش در نشست‌های منطقه‌یی و بین‌المللی، در کنار افغانستان خواهد بود.
خبرنامه افزوده که رئیس‌جمهوری تاجیکستان به‌خاطر گسترش روابط دو جانبه و چندین‌جانبه و توسعه همکاری‌ها، از آقای غنی دعوت کرده است که به این کشور سفر کند.
در این تماس تلفنی هر دو طرف توافق کرده‌اند که هیأتی به ریاست محمد حنیف اتمر، سرپرست وزارت خارجه به این کشور سفر و کارش را روی آجندای نشست هر دو رئیس‌جمهور آغاز کند.
در خبرنامه آمده که هیات افغانستان با هیات تاجیکستان در مورد مسایل سیاسی میان دو کشور، همکاری‌های اقتصادی و امنیتی، به‌ویژه مبارزه علیه تروریزم و مواد مخدر، گفت‌وگو خواهد کرد.
آقای غنی در حالی با همتای تاجیکی‌اش از طریق تلفن صحبت می‌کند که پنج روزی پیش، رئیس‌جمهوری تاجیکستان با مردمان این طرف رودخانۀ آمو از طریق بلندگو صبحت کرد و به آنان وعده همکاری داد. شماری از کابران شبکه‌های اجتماعی این کار را دخالت در امور داخلی افغانستان عنوان کردند.
در خبرنامه ارگ به این موضوع اشاره نشده است.
