افغان تورک مکتبلری مملکتدن آلیب کیتیلیشی توغرسیده خواطرلر تاپیلگندن سونگ مذکور مکتبلر تقدیری انیق لهنیشی اوچون حکومت کمیته تعیین قیلدی. کمیته بو توغریده معلومات بیریش اوچون مجلس نینگ عمومی ییغینیگه چقیریلگن ایدی.
افغان تورک مکتبلری اوزاق ییللردن بیری افغانستانده فعالیت قیلهدی. هر ییلی یوزلب طلبه اوشبو مکتبلرنی یوکسک سویهده بیتریب، کانور سیناویگه کیرهدی. اما تورکیه ده بولیب اوتگن نا موفق قوزغهلاندن سونگ، تورکیه حکومتی نینگ سیاسی مخالفلری بولمیش فتح الله گولنگه قرهشلی مذکور مکتبلر یاپیلیشی توغریسیده سعی وحرکت قیلیندی. تورکیه نینگ کابلدهگی ایلچیلیگی افغان تورک مکتبلرینینگ بوتون مسوولیتی «وقف» ادارهسیگه تاپشیریلیشینی بیلدیردی.
شونینگدیک افغانستان جمهور رییسی محمد اشرف غنی تورکیه حکومتی نینگ بو ایستهگی دن کیین تشکیل بولگن کمیتهگه بو مکتبلرنینگ وقف ادارهسیگه تاپشیریلیشی خصوصیدهگی زیان یا – ده فایده اورگهنیلیشی نی بویوردی.
نمایندهلر مجلسی ایسه افغان تورک مکتبلری توغریسیده معلومات بیریش مقصدیده تشکیل بولگن کمیتهنی مجلسگه چقیرگن ایدی.
کمیته نینگ اعضاسی همده عدلیه وزیرلیگی نینگ اورین باسری سیدمحمدهاشم، افغانستاندهگی افغان تورک مکتبلرینی قندهی لیگینی اورگهنیش اوچون آلیب باریله دیگن فعالیتلر هنوز دوامی بار دیگن. جناب هاشم گه کوره، تورکیه حکومتی اوشبو مکتبلر وقف تشکیلاتیگه تاپشیریلیشی همده مکتب نینگ صفتی سقلنیب قالیشی اوچون بیش میلیون دالر صرفلهشی توغریسیده وعده بیرگن. او، کمیته بو خصوصدهگی بوتون معلوماتلرنی قولگه کیرتگندن کیین جمهور رییسگه تقدیم قیلهدی دیدی.
نمایندهلر مجلس اعضالرینینگ ایریملری مملکتدهگی افغان تورک مکتبلرینینگ تقدیری حقیده سیاسی یاندهشیلمسلیگی بارهسیده تاکید قیلگنلر. اولرگه کوره، مملکت اهالیسی افغان تورک لیسهلرنینگ صفتیدن راضیلر. شونینگدیک مجلس نینگ اعضالری تورکیه حکومتیدن اوشبو مکتبلر سانینی باشقه ولایتلرده هم آشیریشنی طلب قیلگنلر.
مجلس نینگ عالی تحصیلات و معارف وزیرلیگی بوییچه کمیسیون اعضاسی کمال ناصر اصولی، افغان تورک مکتبلری تورت کیشی افغانستانلیک و اوچ نفر تورکیه فقراسی تامانیدن حمایت بوله دیگن تشکیلاتگه قرهشلی دیدی. او، بو مکتبلرنینگ مسوولیتی تورکیه حکومتیگه بیریلگن حالده، شهروندلر حقوقی آیاق آستی بولهدی دیگن.
لیکن، مجلس نینگ باشقه بیر قنچه اعضالری افغانستان حکومتی تورکیه دولتی بیلن علاقهسینی بوزمسیلگی اوستیده تاکید ایتگنلر.
ییغین پایانیده مجلس نینگ باشلیغی عبدالرووف ابراهیمی افغان تورک مکتبلری مسوولیتینی تاپشیریش کمیته معلوماتلرینی بیتیرگندن سونگ ینه مجلسگه چقیریلیب بو توغریده سونگی قرار قبول قیلینهدی دیگن.
