بو ییل سرطان خسته‌لیگی‌نی اورگنیش بوییچه خلق‌ارا اداره و بوتون جهان ساغلیق‌نی سقلش تشکیلاتی مابیل تیلفون‌لری آدملرده خوفلی اوسمه‌لرنی کیلتیریب چیقریشینی بیرینچی مرته اعتراف ایتدی. شو چاققه‌چه بو حقده فقط تخمینلر ایتیب کیلینگن بولسه، ایندی‌لیکده نفوذلی خلق‌ارا تشکیلات‌لر هم قول تیلفون‌لری‌نینگ ضرری حقیده اوزیل – کیسیل فکر بیلدیریشدی.
ایلکترون تولقین‌لری همیشه سلامت‌لیک اوچون ضررلی، دیب حسابلب کیلینگن. اگر او توغریدن – توغری هر کونی قولاققه یانلتیریب توریلسه، اونینگ ایچکریسیده‌گی ایشیتیش همده کوریش اعضالری (کوز تور پرده‌سی) فعالیتینی تأمین ایته‌دیگن مرّکب عصب توقیمه‌لریگه تأثیر کورسه‌تیب باره‌دی. بعضی آدم‌لر گاها کونی‌گه ساعت‌لب مبایل تیلفونی‌نی قولاق‌لریدن آلیشمه‌یدی. بو اورگانیزم اوچون نهایت‌ده آغیرلیک قیله‌دیگن «ضررلی یوک» دیر.
بوتون جهان ساغلیق‌نی سقلش تشکیلاتی ایلگری مبایل تیلفون‌لری ضرری حقیده رسمی خلاصه‌دن تییلیب کلگن ایدی. بیراق اون اوچته مملکت اشتراکیده اوتکزیلگن تدقیقات‌لرنینگ نتیجه‌لری اعلان قیلینگنی‌دن سونگ، مبایل تیلفون‌لری‌نینگ سلامت‌لیک اوچون خطرلی ایکنی‌نی تن آلیش‌گه مجبور بولدی.
مبایل تیلفون ترقه‌ته‌دیگن کوچلی ایلکترون تولقین‌لری باش مییه توقیمه‌لریده اوزگریش‌لر صادر ایته‌دی. باش مییه توقیمه‌لری نینگ ضررلنیشی، اَیریم تدقیقاتچی‌لر فکریگه کوره، بیردنیگه ایمس، بلکه آره‌دن 15-20 ییل اوتگچ‌گینه انیق نمایان بوله‌دی.
شو سببلی اولر 2020 ییل‌گه باریب باش مییه اوسمه‌سی بیلن خسته‌لنگن آدم‌لر سانی کیسکین آشیب کیته‌دی، دیب حسابلشماقده. نیگه‌که، هر کونی اتیگی 15 دقیقه مبایل تیلفون‌ده گپلشیش نینگ اوزی مییه‌ده سرطان اوسمه‌سی حاصل بولیشی اوچون ییترلی دیر. بونده‌ی تیلفون‌لرنینگ، اینیقسه، باله‌لر اوچون خطری کوچلی. «روسيه‌ده حاضر 5 یاش‌دن 19 یاشگچه بولگن 15 میلیون‌دن آرتیق باله و اوسمیر شونده‌ی تیلفون‌لردن فایده‌لنه‌دی»، دییدی فدرا‌ل طبیات بیافیزیکه مرکزی رادیو بیالاگيه لابراتوار‌ی باشلیغی آ.گریگاریو.
– شو نرسه انیقکی، باله‌‌نینگ باش مییه‌سی ایلکترون انرژیلرینی کتّه‌لرگه قره‌گن‌ده کوپراق یوته‌دی. شو باعث، اولر نینگ عقلی رواجلنیشی اوچون مسؤول حسابلنگن باش مییه بولمه‌چه‌لری هم ایلکترون تولقین‌لری تأثیریدن جدّی ضرر کوره‌دی.
شو باعث، مبایل تیلفونی‌دن فایده‌لنووچی باله‌لر، انسانیت تاریخی‌ده بیرینچی مرته، رادیو تولیقن‌لی دیاپزونده‌گی ایلکترون میدانی‌نینگ ضررلی تأثیریده‌گی «خطرلی گروه»گه کیریتیلدی.
دېمک:
باله‌لرگه امکان قدَر «مبایل»نی بیرمنگ. اینگ ضرور حال‌لرده‌‌گینه مبایل‌دن فایده‌لنیش‌گه حرکت قیلینگ. اس مس‌لر یوباریش آرقه‌لی ملاقات اورنه‌تیش ضرر سیز. شوندن فایده‌لنینگ.
«مبایل»دن ایمس، شهر تیلفونی آرقه‌لی قونغیراق‌لشینگ.
تیلفون‌نی چونته‌گینگیزده آلیب یورمنگ، دستکول‌ده یاکه تنه‌نگیزدن اوزاقراق حالده سقلنگ.
اوخله‌یات گنینگیزده تیلفون یانینگیزده بولمسین. «مبابیل»نی کمی دیگن‌ده اوزینگیزدن 1،5 متر نریگه قویینگ.
گپلشه‌یاتگن‌ده تیلفون باشینگیزگه یقین تورمس‌لیگی اوچون قولاققه تقیله‌دیگن ایشیتگیچ یاکه سیمسیز جهازلردن فایده‌لنینگ.
