لوی څارنوال فرید حمیدي وايي، د دې معاونیت جوړېدل له ښځو سره د تاوتریخوالي مخنیوي په چارو او د ماشومانو سرغړونو د دوسیو په څېړنه کې خورا ارزشت لري او د کورني تاوتریخوالي کچه به را کمه کړي.
د لویې څارنوال په خبره، مېرمنې له سیاسي حقونو برخمنې دي او د دې معاونیت د کار له پیل سره به د ښځو او ماشومانو اړوند حقونه به په پوره ډول عملي شي.
د بشرحقونو خپلواک کمېسیون مشرې سیما سمر وویل، د دغه ډول معاونیت جوړول د مېرمنو پر وړاندې د تاوتریخوالي قضیو ته د رسېدنې او د ماشومانو د سرغړونو او د هغوی د حقونو د ټینګښت په برخه کې مهم کار دی.
نوموړې وايي، له مېرمنو سره د تاوتریخوالي کلتور له کورنیو پلېږي او د دې تاوتریخوالي د جرړو ختمولو له پاره باید د هېواد په تدریسي بهیر کې کار وشي.
لویه څارنوالۍ او د بشرحقونو خپلواک کمېسیون په دې باور دي، چې د مېرمنو سره د تاوتریخوالي او د ماشومانو د سرغړنو د مخنیوي او د هغوی د حقونو تامینولو په برخه کې باید ټول بنسټونه په ځانګړي ډول د پوهنې وزارت، د لوړو زده کړو وزارت او د حج او اوقافو وزارت په ګډه همکاري وکړي.
