تېرې یوې اوونۍ کې فراه ولایت کې بېمخینې بارانونه شوي او له امله یې سېلابونه راوتي دي.
د فراه له طبیعي پېښو سره د مبارزې رییس عبدالقدیر الهام د دې ولایت پشتکوه، اناردره، خاکسفید، پشترود او بالابلوک ولسوالیو کې د وروستیو سېلابونو راوتو په پایله کې د اوښتو زیانونو کچه لوړه بولي.
ښاغلی الهام سلاموطندار ته وايي، د لومړنیو ارزونو لهمخې، پشتکوه ولسوالۍ کې ۲۵۰ کورونه په بشپړه او قسمي توګه له منځه تللي او همداراز، اناردرې ولسوالۍ کې ۱۰۰ دوکانونه او ۱۰۰ کورونه وران شوي. د ده په خبره، دا لومړني معلومات دي او له څوو نورو ولسوالیو هم راپورونه ور رسېدلي دي.
ورته مطالب:
بغلان؛ ۳ زره کورنۍ په واورو کې ګیر دي
سلګونه کسان د بامیان ـ غور پر لویه لار بند پاتې دي
سمنګان؛ کورني بېځایه شوي سختې شپې او ورځې تېروي
د فراه له طبیعي پېښو سره د مبارزې رییس په وینا، د دغو سېلابونو پایله کې، ۶ کسانو هم ژوند بایللی دی.
دی زیاتوي، خاکسفید، پشترود او بالابلوک ولسوالیو کې سلګونه جریبه کرنیزه ځمکه، د اوبو څاګانې، باغونه او پلچکونه وران شويدي.
د فراه له طبیعي پېښو سره د مبارزې رییس ټینګار کوي چې زیانمنو شویو سره یو لړ بېړنۍ مرستې شوي؛ خو دغه مرستې بسنه نه کوي او هغه له مرسته کوونکو بنسټونو د ډېرو مرستو غوښتنه کوي.
په همدې حال کې د فراه د کرنې رییس منان متین وايي، د ورښت کچه سل په سلو کې لوړه شوې؛ خو د اوبو بندونو نهشتون په دلیل، دغه اوبه ګاونډیو هېوادونو ته روانې دي.
هاخوا د هرات له طبیعي پېښو سره د مبارزې رییس عبدالحمید مبارز حمیدي هم وايي، دغه ولایت کې د وروستو سېلابونو پایله کې، ۶ کسان وژل شوي، ۴ نور ټپي دي او څه باندې ۲ سوه کورونه هم وران شويدي.
د ښاغلي حمیدي په وینا، د هرات ښار ترڅنګ انجیل، ګذرې، ادرسکن، زندهجان، غوریان، چشت، کهسان او رباط سنګي ولسوالیو کې هم سېلابونو زیانونه رامنځته کړيدي.
پر دې ټولو سربېره، بادغیس ولایت کې هم د درنې واورې ورېدو د دغه ولایت اوسېدونکیو ته ستونزې جوړې کړي.
د بادغیس محلي مسوولان وايي، دې ولایت کې د بېمخینې واورې ورښت لامل شوی، چې د بادغیس ـ هرات لویه لار د باروړونکو موټرو تګ ـ راتګ لهپاره وتړل شي.
د بادغیس مرستیال والي سید محمد میرزا زاده سلاموطندار ته وايي، د دغه ولایت د ټولګټو ریاست ډلې د بند سبزک برخو ته لېږل شوي او د بادغیس ـ هرات لویه لار به ډېر ژر د باروړونکیو موټرو پرمخ پرانیستل شي.
